Марказий банк 5 та банкни жаримага тортди

Марказий банкнинг Банк назорати қўмитаси томонидан 2025 йилнинг феврал ойидаги йиғилишларида 43 та масала кўриб чиқилди, деб хабар беради регулятор матбуот хизмати.

Қайд этилишича, рўйхатга олиш ва рухсат бериш йўналишида 31 та масала кўрилган. Бундан ташқари, кредит ташкилотларининг молиявий ҳолатига оид 12 та масала – Марказий банк кўрсатмалари ва пруденциал меъёрлари талабларининг бажарилиши, тижорат банкларида ўтказилган ўрганиш натижалари ҳам муҳокама қилинган.

Марказий банк томонидан ўтказилган ўрганишлар натижасида аниқланган камчиликлар, жумладан, Марказий банк томонидан ўрнатилган иқтисодий меъёрларга ва қонунчилик талабларига риоя қилинмагани учун учта банк чора ва санкциялар қўлланиши тўғрисида огоҳлантирилган.

Шунингдек, амалдаги қонунчилик, Марказий банк томонидан ўтказилган ўрганиш ва инспекция текширувлари давомида аниқланган қоидабузарликлар учун бешта банкка нисбатан жарима санкцияси қўлланган.

Эслатиб ўтамиз, январ ойида Марказий банк 10 та банкни жаримага тортган, шунингдек, қонунчилик талабларига риоя қилмаган 1 та тўлов тизими оператори чора ва санкциялар қўлланиши тўғрисида огоҳлантирган эди.