Хитой Тайван яқинида ҳарбий ўқув машғулотларини бошлаб, орол президентини «паразит» деб атади

Хитой Қуролли кучлари армияси, флоти, авиация ва ракета қўшинлари 1 апрелдан Тайван ороли яқинида қўшма ўқув машғулотларини бошлади, деб хабар беради CNN.

«Бу Тайван мустақиллиги тарафдори бўлган айирмачи кучлар учун жиддий огоҳлантириш ва кучли тийиб турувчи омил бўлиб, Хитойнинг суверенитети ҳамда миллий бирлигини ҳимоя қилиш учун қонуний ва зарурий чорадир», — дейилади ХХР армияси қўмондонлиги баёнотида.

Ўқув машғулотлари давомида хитойлик ҳарбийлар Тайванга «бир нечта йўналишда яқинлашади» ва турли манёврларни синовдан ўтказади.

Хитой ҳарбийлари ўз баёнотида Тайван президенти Лай Лай Циндэни «паразит» деб атади. ХХР томонидан эълон қилинган роликда Тайван раҳбари қўлида овқат учун мўлжалланган таёқни ёнаётган орол узра кўтариб турган қўнғиз кўринишидаги мултқаҳрамон сифатида тасвирлаган.

Хитой Халқ-озодлик армияси Тайван атрофидаги қўшма ҳарбий машғулотлар бошланишига бағишланган видеони эълон қилди.

Тайван расмийлари ҳарбий машғулотларни «ҳаддан ташқари масъулиятсизлик» деб атаб, демократик давлатларни «Хитойни муаммолар келтириб чиқараётгани учун қоралашга» чақирди. Тайван Мудофаа вазирлиги эса Хитой Халқ Республикаси машғулотларини кузатиш ва «тегишли чораларни кўриш» мақсадида самолётлар ва кемалар юборилганини маълум қилди.

Хитой Тайванни ўзининг ҳудуди деб ҳисоблайди. ХХР ҳукумати бир неча бор оролни куч билан назорат остига олишга тайёрлигини билдирган. Bloombergʼга кўра, Хитой Тайванга ҳужум қилса, уруш жаҳон ялпи ички маҳсулотининг 10 фоизига тушиши билан бирга, ХХРнинг АҚШ билан тўғридан тўғри ҳарбий тўқнашувларига сабаб бўлади.