НАТО разведкаси Россия армиясининг Украинадаги тахминий йўқотишларини маълум қилди

Бу ҳақда Deutsche Welle НАТОнинг номаълум юқори мартабали амалдорига таяниб хабар берди.

Амалдорнинг сўзларига кўра, Россия армияси кунига (ҳалок бўлганлар ва яраланганлар қўшиб ҳисобланганда) минг нафардан ортиқ ҳарбийни йўқотмоқда. Унинг таъкидлашича, яраланган кўплаб россиялик аскарлар сифатсиз тиббий хизмат туфайли ногиронликка учраган. Бу маълумотлар НАТО ташқи ишлар вазирларининг Брюсселдаги учрашуви доирасида маълум қилинди.

Шу билан бирга, НАТО вакили Россия қўшинларида йўқотишларни қисқа муддатда тўлдиришга муваффақ бўлаётганини қайд этди. Унинг таъкидлашича, Россия армиясининг Украинадаги ҳаракат темпи пасаймоқда, йўқотишлар эса ортмоқда. Аммо «Россия ҳукумати секин илгарилаш эвазига катта йўқотишларга тайёрлигини намоён қилмоқда». НАТО вакилининг сўзларига кўра, Россия жамияти ҳозирча бу даражадаги қурбонлар сонидан оммавий норозилик билдиришга тайёр эмас.

Интернетдаги некрологлар ва очиқ манбалар орқали шахсан аниқланган ҳалок бўлган россиялик ҳарбийлар сони ҳам 100 мингдан ошиб кетди. Уларнинг 4842 нафари — офицерлар. Ҳалок бўлганлар сони бўйича биринчи ўринда — Бошқирдистон. Республикадан фронтга жўнатилганлар орасида 4487 киши ҳалок бўлган. Иккинчи ўринда — Татаристон (4 371 тасдиқланган ҳалок бўлган). Учинчи ўринни эса Свердловск области эгалламоқда — 3446 қурбон.