Apple Трамп тарифларини четлаб ўтиш учун Ҳиндистондан 1,5 миллион дона iPhone олиб чиқади

Apple Ҳиндистондан Қўшма Штатларга 1,5 миллион дона iPhone етказиб бериш учун чартер юк рейсларига буюртма берди. Шу йўл билан компания АҚШ президенти Доналд Трампнинг тарифларини четлаб ўтишга ҳаракат қилмоқда, деб хабар берди Reuters.

Қайд этилишича, бу қарор Apple компаниясига АҚШда смартфонлар захирасини тўплашда ёрдам бериши мумкин. Аввалроқ компания Ҳиндистонда смартфон ишлаб чиқариш ҳажмини оширган эди.

Агентликнинг эслатишича, таҳлилчилар АҚШда iPhone нархи кескин ошишини башорат қилишган. Чунки Apple компаниясининг аксарият қурилмалари Хитойда йиғилади. Трамп эса Хитойдан импорт қилинадиган товарларга 125 фоиз бож жорий қилган.

Шу ҳафтада Трамп Ҳиндистонга жорий қилинган 26 фоизлик божни 90 кунга тўхтатиб туришини эълон қилди. Apple эса ушбу танаффусдан унумли фойдаланмоқчи.

Компания, шунингдек, Ҳиндистоннинг жанубий Тамил Наду штатидаги Ченнай аэропортида божхона расмийлаштируви вақтини 6 соатгача қисқартиришни истамоқда. Бу одатда 30 соат давом этарди, деди манба. Агентликнинг қўшимча қилишича, Apple Хитойнинг айрим аэропортларида ҳам худди шундай схемадан фойдаланади.

Манбанинг таъкидлашича, янги божлар кучга киргандан сўнг март ойидан буён 100 тонна сиғимга эга 6 та юк самолёти Ҳиндистондан ҳавога кўтарилган.

Агентликнинг эслатишича, Apple ҳар йили дунё бўйлаб 220 миллиондан ортиқ iPhone смартфонларини сотади. Ҳозир АҚШга iPhone импортининг бешдан бир қисми Ҳиндистондан, қолган қисми эса Хитойдан келади.

Таҳлилчиларнинг ҳисоб-китобларига кўра, бож тарифлари iPhone нархини кесикн ошириши мумкин. Оқибатда смартфонларга талаб сезиларли даражада камаяди.