Сурхондарёда судяга 1000 доллар пора таклиф қилган адвокат ушланди

Сурхондарё вилоятида жиноят иши бўйича шикоятни қаноатлантириб бериш эвазига судяга пора таклиф қилган адвокат қўлга олинди. Бу ҳақда Судьялар олий кенгаши хабар берди.

Қайд этилишича, Сурхондарё вилоят суди иш юритувидаги Ш.Ҳ.га (биринчи инстанция суди томонидан Жиноят кодексининг 168-моддаси 4-қисми «а» банди билан айбли деб топилган, ҳукм апелляция инстанциясида ўзгаришсиз қолдирилган) доир жиноят иши бўйича берилган тафтиш шикоятини қаноатлантириб бериш эвазига судяга (жиноят иши бўйича маърузачи) 1000 АҚШ доллари миқдорида пора таклиф қилган адвокат ушланган.

«Адвокат иш бўйича фуқаровий даъвогарнинг вакили бўлиб, тафтиш шикояти қонуний кўриб чиқилиши тушунтирилишига қарамай такрор пора таклиф қилгани ортидан, судьянинг билдиргиси асосида, ваколатли орган томонидан тадбир ўтказилган ва у далилий ашё билан қўлга олинди», — дейилади хабарда.

Аввалроқ Боёвут тумани ИИБ бошлиғи ўринбосари қўзғатилган жиноят иши доирасида гумонланувчиларга қамоққа олиш тарзидаги эҳтиёт чораси қўлламасликни ваъда қилиб, бу учун 10 минг доллар олганида ушланган эди. Шунингдек, Тошкент шаҳар ФВБ бошлиғи ўринбосари тамагирлик йўли билан пора олиб келганликда гумонланиб қўлга олинганди.