Танзила Норбоева раислигида Сурхондарёни ижтимоий-иқтисодий ривожлантириш дастурлари ижроси муҳокама қилинди

2 июль куни Олий Мажлис Сенати Кенгашининг Термиз шаҳрида бўлиб ўтган сайёр мажлисида Сурхондарё вилояти ҳудудларни ижтимоий-иқтисодий ривожлантириш, аҳоли бандлигини таъминлаш ҳамда камбағалликни қисқартириш бўйича амалга оширилаётган ишлар муҳокама қилинди.

Олий Мажлис Сенати Раиси Танзила Норбоева бошчилигида ўтказилган мажлисда Сенат ишчи гуруҳининг парламент назорати доирасида қонунчилик ҳужжатларида белгиланган вазифалар вилоятда бажарилишини ўрганиш натижалари кўриб чиқилди.

Таъкидланганидек, вилоятда жорий йилнинг I чорагида ялпи ҳудудий маҳсулот ҳажми 13,4 трлн сўмни ташкил этиб, ўсиш суръати 9,1 фоизга етди. Аҳоли жон бошига тўғри келадиган ЯҲМ ҳажми 4,4 млн сўмни ташкил этди. Иқтисодиёт тармоқларида ижобий динамика кузатилиб, саноат маҳсулотлари ишлаб чиқариш 8,7 фоизга, бозор хизматлари 16,3 фоизга, қишлоқ хўжалиги 9,7 фоизга, қурилиш ишлари эса 10 фоизга ўсди.

Кузатилган иқтисодий фаоллик натижасида 2026 йил 1 апрель ҳолатига кўра фаолият юритаётган тадбиркорлик субъектлари (юридик шахслар) сони 21,5 мингтани ташкил этиб, 2025 йилнинг мос даврига нисбатан 8,7 фоизга ёки 1,7 мингтага кўпайган.

Жорий йилда вилоятда 2 млрд АҚШ доллари миқдорида хорижий инвестициялар ва кредитларни жалб этиш режалаштирилган бўлиб, биринчи чоракда 499,1 млн доллар ўзлаштирилди.

Ташқи савдо айланмасида экспорт улуши 53 фоизни ташкил этди. Экспорт ҳажми 126,4 млн АҚШ долларига еттди ёки ўтган йилнинг мос даврига нисбатан 9,4 фоизга ўсди.

Инвестиция дастурлари доирасида умумий қиймати 34 млн долларлик 77 та лойиҳа ишга туширилиши натижасида қарийб 900 та янги иш ўринлари яратилди.

Кичик ва ўрта бизнес субъектларини молиявий қўллаб-қувватлаш мақсадида 2,9 трлн сўм кредит маблағлари йўналтирилди, шундан 869 млрд сўм маблағ тадбиркорлик дастурлари доирасида ажратилди.

Муҳокама жараёнида масъул вазирлик ва идоралар, маҳаллий давлат ҳокимияти органлари раҳбарларининг ахборотлари эшитилди ҳамда мавжуд камчиликларга ҳам алоҳида эътибор қаратилди.

Хусусан, жорий йилнинг ўтган беш ойида 6 та йирик саноат корхонасида ишлаб чиқариш ҳажми 2025 йилнинг мос даврига нисбатан пасайган. Маҳаллийлаштириш дастури доирасида Бойсун, Жарқўрғон ва Шўрчи туманларида лойиҳалар белгиланган муддатларда амалга оширилмаган.

Муаммоли кредитлар қолдиғи 2025 йилнинг мос даврига нисбатан Ангор, Қумқўрғон ва Термиз туманларида ошган, Жарқўрғон ва Шўрчи туманларида фаолиятсиз корхоналар улуши юқорилигича қолмоқда. Шунингдек, микролойиҳаларни ташкил этиш бўйича режа кўрсаткичлари Денов, Бойсун ва Сариосиё туманларида тўлиқ бажарилмаган.

Музработ ва Олтинсой туманларида 2021 йилда ташкил этилган ёшлар саноат ва тадбиркорлик зоналарида ҳалигача лойиҳалар ишга туширилмаган.

Сенаторлар аҳоли бандлигини таъминлаш ва камбағалликни қисқартириш масалалари ҳам танқидий муҳокама қилинди. Жорий йилнинг январь–май ойларида 18 минг фуқаро доимий иш ўринларига жойлаштирилган, 195 минг киши даромадларини оширишга қаратилган хизматлар билан қамраб олинган, 24 минг норасмий банд бўлган шахснинг меҳнат фаолияти легаллаштирилган. I чорак якунларига кўра ишсизлик даражаси 4,8 фоизгача пасайган.

Шу билан бирга, айрим туманларда аҳолини доимий иш ўринларига жойлаштириш, хизмат кўрсатиш ва сервис лойиҳаларини амалга ошириш ҳамда қурилиш соҳасида янги иш ўринлари яратиш бўйича режалар тўлиқ бажарилмагани қайд этилди.

Муҳокама давомида сенаторлар томонидан инвестиция лойиҳаларини амалга оширишни жадаллаштириш, саноат зоналари самарадорлигини ошириш, экспорт ҳажмини кўпайтириш, тадбиркорликни қўллаб-қувватлаш механизмларини кучайтириш, аҳоли бандлигини таъминлаш ва камбағалликни қисқартириш ишларини янги босқичга олиб чиқиш бўйича қатор таклиф ва тавсиялар билдирилди.

Мажлис якунида Олий Мажлис Сенати Кенгашининг тегишли қарори қабул қилинди.