Хитойда кучли шамол сабаб вазни 50 килодан енгил аҳолига кўчага чиқмаслик тавсия қилинди

Хитойнинг шимолий ҳудудларида вазни 50 килограммдан кам бўлган аҳолига 13 апрелга қадар уйдан кўчага чиқмаслик тавсия қилинди, деб хабар беради BBC.

Қайд этилишича, минтақада жуда кучли шамол кузатилиши кутилмоқда, расмийларнинг огоҳлантиришича, у енгил вазнли инсонларни «шунчаки учириб кетиши» мумкин. Прогнозларга кўра, шамол тезлиги соатига 150 километрга етади.

Огоҳлантириш Хэбэй провинцияси, шунингдек, Пекин ва Тянцзин шаҳарларига тегишли. Таъкидланишича, Пекин учун сўнгги ўн йилдаги биринчи марта бу каби огоҳлантириш берилмоқда.

Хитой метеорологлари шамол кучини 17 балли шкала бўйича баҳолайди. Дам олиш кунлари кузатиладиган шамол тезлиги 11-13 баллга етиши мумкин. Ўз навбатида бу «катта талафотларни» юзага келтиради.

Ҳукумат аллақачон минтақада яқин кунларда ўтказилиши режалаштирилган барча спорт тадбирларини, жумладан, дунёдаги илк бор ташкил этилиши керак бўлган одамсимон роботлар ўртасидаги ярим марафонни ҳам бекор қилган.

«Мазкур дам олиш кунлари ҳеч қайси таълим муассасалари ишламайди, боғлар, аттракционлар ёпилади, қурилиш ишлари ва поездлар ҳаракатлари тўхтатилади», — дейилади хабарда.