КХДРда мамлакат тарихидаги энг катта ҳарбий кемани қуриш бошланди

Шимолий Корея ўз тарихидаги энг катта ҳарбий кемани қуришни бошлади, деб хабар бермоқда CNN. Кемани қуриш ишлари Нампо — Пхеняндан тахминан 60 километр узоқликдаги корхонада амалга оширилмоқда. 

Қайд этилишича, 6 апрел куни Maxar Technologies ва Planet Labs сунъий йўлдошлари кемани тасвирга олишга муваффақ бўлган. Суратлар таҳлилига кўра, бу денгиз ва ердаги нишонларга қарши бошқарилувчан ракеталарга эга фрегат бўлади.

Кема ўлачами жиҳатида КХДРда мавжуд бошқа барча кемалардан икки баробарга катта. Стратегик ва халқаро тадқиқотлар маркази таҳлилида келтирилишича, унинг ўлчами 140 метрга етади. Фрегатни вертикал ракета учириш тизимлари ва Шимолий Корея флотида илгари қўлланилмаган радар ускуналари билан жиҳозлаш режалаштирилган. Пхенян БМТ санкциялари сабаб бундай ускуналарга эга бўлмаслиги керак, шу боис Украинага қарши урушда ёрдам бераётгани учун Россия КХДРни таъминлаётган бўлиши мумкин.

АҚШ Ҳарбий-денгиз кучларининг собиқ капитани Карл Шустернинг таъкидлашича, Шимолий Кореяни янги ҳарбий кемаси денгиз синовларига тайёр бўлиши учун яна бир йил ёки ундан кўпроқ вақт керак бўлади. Унинг сўзларига кўра, асосий муаммо — алоқа тизимлари, электроника, датчиклар ва замонавий қуролларни ягона тизимга интеграция қилиш бўлади. Бундан ташқари, бу даражадаги улкан ҳарбий кемани бошқариш учун катта миқдорда молиявий ва инсон ресурслари талаб этилади. Жанубий Корея Миллий йиғини разведка бўйича қўмитаси аъзоси Ким Бен Ки олдинроқ Пхенянда бундай имкониятлари мавжудлигига шубҳа билдирганди. «Бу каби кема эксплуатацияси катта харажатларни, жумладан, ускуналар ва ёқилғини талаб қилади. Бундан ташқари, битта йирик ҳарбий кема денгизга ёлғиз чиқа олмайди. Шу боис савол юзага келади: Шимолий Корея бундай харажатларга дош бера оладими?» — деган у.

Ўз навбатида Жанубий Корея адмирали Ким Дук Ки якуний маҳсулот қандай бўлиши, айниқса, унинг ҳалокатли кучини паст баҳолаш мумкин эмаслигини таъкидлаган. «Агар Шимолий Корея янги фрегатни январ ойида муваффақиятли синовдан ўтказганини маълум қилган гипертовушли баллистик ракета билан жиҳозласа, бу минтақадаги хавфсизлик вазиятини тубдан ўзгартириб юбориши мумкин», — дея қўшимча қилган собиқ денгиз офицери.

АҚШ Мудофаа вазирлигининг Разведка бошқармасига (DIA) кўра, 2021 йилда Шимолий Корея флотида тахминан 400 та жанговар патрул кемаси ва 70 та сувости кемаси бўлган, бироқ уларнинг деярли барчаси эскирган. Фақатгина 1970 йилларда қурилган икки «Наджин» синфидаги фрегат очиқ денгиз жанглари учун яроқли ҳисобланади. DIA ҳисоботида келтирилишича, Жанубий Корея ёки АҚШ билан юз бериши мумкин бўлган исталган можарода Шимолий Корея флоти асосан қирғоқ мудофааси билан чекланади, чунки иккала давлат ҳам ҳарбий-денгиз кучларида устуворликка эга.

Шу билан бирга, КХДР етакчиси Ким Чен Ин флотни модернизация қилишни давом эттирмоқда: янги фрегатдан ташқари Синпо портида атом сув ости кемаси, Чхонжин шаҳрида эса яна бир йирик эсминец қурилмоқда. Шунингдек, сув остидан учириладиган ракеталар ва уларни ташувчи сувости кемалари ишлаб чиқиляпти. Сентябр ойида эса Ким катта ўлчамли кемалар учун янги база қурилаётган ҳудудни кўздан кечирган эди.