Арманистон парламентида депутатлар жанжаллашиб кетди

Жанжалга арманлар геноцидини инкор этганлик учун жиноий жавобгарликни жорий этиш бўйича келишмовчилик сабаб бўлди.

Арманистон парламентида ҳукмрон «Фуқаролик келишуви» партияси ва мухолиф «Арманистон» фракция депутатлари ўртасида жанжал содир бўлди, деб ёзади News.am.

Қайд этилишича, жанжалга арманлар геноцидини инкор этганлик учун жиноий жавобгарликни жорий этиш бўйича келишмовчилик сабаб бўлган. Барчаси парламент спикери Ален Симоняннинг тортишувидан бошланган. «Арманистон» депутатларининг эътирозига жавобан у ўз ўринларидан туриб гапирмасликни талаб қилган.

«Ўтиринг, сиз ҳам ўтиринг, бу болалар боғчаси эмас, тинчланинг. Нима десаларинг ҳам, жавоб битта», — деган Ален Симонян.

Шундан кейин депутатлар бир-бирини туртишни бошлаган. Жанжалга бошқа партияларнинг вакиллари ҳам қўшилган. Йиғилишнинг тўғридан-тўғри трансляцияси ўчириб қўйилган, спикер 20 дақиқалик танаффус эълон қилган.

Арманистонда 24 апрел арман геноциди қурбонларини хотирлаш куни. Бугун «Арманистон» партияси депутатлари геноцидни инкор этганлик учун жиноий жавобгарлик белгилаш тўғрисидаги қонун лойиҳасини кўриб чиқишга қўйишни режалаштирган эди.