Қайси тўловларни тўлиқ нақдсиз шаклга ўтказиш масаласи муҳокама қилинди

Стратегик ислоҳотлар агентлигида электрон тўловлар улушини ошириш бўйича комплекс чора-тадбирлар режасини тайёрлаш доирасида молиявий сектор вакиллари билан учрашув ташкил этилди. Бу ҳақда агентлик матбуот хизмати хабар бермоқда.

Навбатдаги учрашувда етакчи тўлов ташкилотлари — Click асосчиси ва бош директори Улуғбек Рустамов, OSON юридик директори Дилшод Келдияров ва Paynet бош директори Анвар Исамуҳамедов иштирок этди.

Мулоқотда электрон тўловларнинг бошқа ҳисоб-китоб шаклларига нисбатан рақобатбардошлигига таъсир қилувчи омиллар, шунингдек, электрон тўловларни қабул қилиш мажбурий бўлиши лозим бўлган соҳалар рўйхатини кенгайтириш зарурлиги муҳокама қилинди.

Тўлов ташкилотлари вакиллари автотураргоҳлар ва бозорларда патент тўловларини йиғиш каби айрим соҳаларда ҳанузгача нақд тўловлар устунлигини қайд этди. Бу соҳаларни электрон тўловларни қабул қилиш мажбурий бўлган йўналишлар рўйхатига киритиш таклифи илгари сурилди.

Шунингдек, темирйўл чипталари савдоси, коммунал хизматлар тўлови ва маркетплейслар орқали харидлар бўйича 100 фоиз нақдсиз ҳисоб-китоб тизимига ўтиш ташаббуси муҳокама қилинди.

Маълум қилинишича, Стратегик ислоҳотлар агентлиги электрон тўловлар улушини ошириш, замонавий ва қулай тўлов инфратузилмасини яратишга қаратилган президент қарори лойиҳасини тайёрлаяпти. Бунинг учун агентлик бизнес, IT соҳаси вакиллари ва экспертлар билан мулоқотлар ўтказмоқда.