Литва Беларус устидан БМТ Халқаро судига даъво киритди

Литва ҳукумати БМТ Халқаро судига даъво киритиб, Беларусни ноқонуний миграцияни ташкил этгани учун жавобгарликка тортишни талаб қилмоқда. Бу ҳақда Литва ТИВ пресс-релизида сўз боради.

Қайд этилишича, 2021 йилдан бошлаб Литва Беларусдан кириб келаётган ноқонуний мигрантлар оқимининг «мисли кўрилмаган даражада ошиши»га дуч келмоқда. Литва идоралари Беларус ҳукуматининг миграция оқимларини ташкил этишдаги иштирокини тасдиқловчи далилларни тўплаган.

Баёнотга кўра, Беларус ҳукумати бунинг учун Яқин Шарқ ва бошқа минтақалардан авиақатновлар сонини кўпайтирган, виза беришни ва келган мигрантларни жойлаштиришни ташкил қилган ҳамда уларнинг кўпчилигини Литва чегарасига олиб борган. Натижада бу мигрантлар чегарани ноқонуний равишда кесиб ўтишга мажбур бўлган.

Таъкидланишича, Беларус чегара хизматлари Литва ҳукумати билан ноқонуний миграцияни тўхтатиш бўйича ҳамкорлик қилишдан бош тортган. Литва буни Беларус ҳукуматининг мамлакатдаги демократияни қўллаб-қувватлаган Европа Иттифоқига сиёсий босим ўтказиш воситаси сифатида миграциядан фойдаланишга уриниш деб баҳоламоқда.

Литванинг суддаги талаблари қуйидагиларни ўз ичига олади: Беларус томонидан етказилган зарарни, жумладан, чегара бўйлаб девор қуриш харажатларини тўлиқ қоплаш ва бундай ҳолатлар бошқа такрорланмаслиги кафолатларини таъминлаш.

2024 йилда Литва Александр Лукашенко режими томонидан амалга оширилган инсониятга қарши жиноятлар бўйича тергов бошлашни сўраб, Халқаро жиноий судга мурожаат қилганди.

Чегарадаги миграция инқирози 2021 йилнинг баҳорида, Беларусга келган Яқин Шарқ ва Африка давлатлари фуқаролари Литва ҳамда Полшага ўтишга уринганида бошланган эди. Александр Лукашенко ўшанда Минск мигрантларнинг Европага ўтишига халақит бермаслигини айтганди, унинг сўзларига кўра, Европа давлатлари Беларусга қарши «гибрид урушни бошлаган».