Украина делегацияси Истанбулдаги музокараларнинг навбатдаги раундига йўл олади — Зеленский

Володимир Зеленский Киев делегацияси 2 июн куни Истанбулда ўтказилиши режалаштирилаётган Россия—Украина музокараларининг иккинчи раундида иштирок этишини тасдиқлади.

«Мустақиллигимиз, давлатимиз ва одамларимиз ҳимояси учун барча ишни қиляпмиз. Яқин вақт учун вазифани белгилаб олдим. Душанба куни Истанбулда ўтказиладиган учрашув олдидан позициямизни белгиладим.

Биринчидан — тўлиқ ва сўзсиз ўт очишни тўхтатиш. Иккинчидан — асирларнинг озод қилиниши. Учинчидан — ўғирлаб кетилган болаларнинг қайтарилиши. Ишончли ва узоқ муддатли тинчлик ўрнатиш ҳамда хавфсизликни кафолатлаш учун — энг юқори даражадаги учрашувга тайёргарлик кўриш. Асосий масалаларни фақат етакчилар ҳал қила олади. Душанба кунги делегациямизга Рустем Умеров раҳбарлик қилади», — деб ёзади Украина президенти ўзининг Telegram каналига.

Шунингдек, Зеленский 1 июн кунги йиғилишда мудофаа вазири, ташқи ишлар вазири, Бош штаб, разведка ва Украина Хавфсизлик хизматидан ҳисоботларни тинглаганини маълум қилди.

ТАССнинг ўз манбаларига таяниб хабар беришича, музокараларда иштирок этадиган Россия делегацияси Истанбул томон йўлга чиққан. РФ делегациясига президент ёрдамчиси Владимир Мединский раҳбарлик қилмоқда. 28 май куни Умеров ва Мединский телефон орқали мулоқот қилиб, музокаралар санаси ва вақтини муҳокама қилган эди.

Россия вакиллари музокаралар давомида ўт очишни тўхтатиш бўйича меморандум лойиҳаси ва бошқа таклифларни тақдим этади.