Россияда World of Tanks ўйини дастурчилари «экстремистик уюшма» деб эълон қилинди

Москванинг Таганский туман суди Wargaming эгаси Виктор Кислий ва «Леста Игры» компанияси эгаси Малик Хатажаевни «экстремистик уюшма» аъзоси деб топди.

Россия Бош прокуратураси улар устидан 2025 йил апрелида судга мурожаат қилган эди.

Бош прокуратура шунингдек, «Леста Игры» устав капиталидаги 100% улушни давлат фойдасига мусодара этишни талаб қилди. Суд бу талабни қондирди.

«Экстремистик фаолият» далили сифатида Бош прокуратура, хусусан, қуйидаги мақолаларни келтирди: «World of Tanks ўйини Россия махсус ҳарбий операциясига қарши», «Wargaming 25 йил давомида қандай омон қолди ва Украинадаги урушга қарши курашди» ва «Wargaming украиналиклар учун ренаимобиллар йиғиш мақсадида хайрия лойиҳасини бошлади».

Суд қарорига изоҳ бераркан, Россия Давлат Думаси IT қўмитаси раисининг биринчи ўринбосари Антон Горелкин фикрича, World of Tanks, World of Warships ва «Леста Игры»нинг бошқа маҳсулотлари фойдаланувчилари учун «хавотирга ўрин йўқ».

«Уларни Украина Қуролли Кучларини қўллаб-қувватлаганликда ёки ўйин ичидаги харидларни амалга оширганлик учун экстремизмда айблаб бўлмайди... Бундан ташқари, «Леста Игры» активлари тез орада давлат назоратига ўтади ва кейинчалик Россия махсус компаниясига топширилади», деб ёзди у.

«Леста Игры» - Россиядаги «Мир танков», «Мир кораблей» ва Tanks Blitz лойиҳаларини бошқарадиган Санкт-Петербургдаги ўйин студияси. Илгари у World of Tanks, World of Warships, Order of War ва бошқа онлайн ўйинларни ишлаб чиқадиган беларуслик тадбиркор Виктор Кислийнинг Wargaming компанияси таркибига кирган.