Tesla ва Трампнинг фирмалари акциялари Маск билан баҳсдан кейин қулади

Доналд Трамп ва Илон Маск ўртасидаги келишмовчилик уларнинг компаниялари акциялари нархининг тушишига сабаб бўлди. Миллиардер Маск президентга импичмент эълон қилиш чақириқларини маъқуллади ва ўз партиясини яратишга тайёрлигини маълум қилди.

Фото: AP

5 июн, пайшанба куни АҚШ президенти Доналд Трамп ва унинг шериги, мултимиллиардер Илон Маск ўртасидаги оммавий тортишув уларнинг компаниялари акциялари нархининг кескин тушиб кетишига сабаб бўлди. Маскнинг Tesla корхонаси акциялари бир неча соат ичида қарийб 15 фоизга, ҳар бир акция учун 322 доллардан 275 долларгача арзонлашди. Шу билан бирга, 2021 йилда республикачилар томонидан асос солинган Trump Media & Technology Group медиакомпанияси 11 фоизга тушиб, 21,8 доллардан 19,3 долларга пасайди. Трамп фирмаси DJT белгиси остида савдо қилади, бу Америка президенти исм-шарифининг бош ҳарфлари билан мос келади. Маск Трампни танқид қилган постларидан бирида шундай ёзган эди: «Кунингиз хайрли ўтсин, DJT!».

Ошкора келишмовчилик Трампнинг Оқ уйда Германия канцлери Фридрих Мерц билан учрашуви чоғида авж олди. АҚШ президенти журналистларга кўп миллиард долларлик ҳукумат харажатлари тўғрисидаги янги қонун лойиҳасини танқид қилгани учун «Илондан ҳафсаласи пир бўлганини» айтди. Трампнинг айтишича, Маскнинг норозилиги асл сабаби АҚШда электромобиллар учун давлат субсидияларининг камайиши, у миллиардер компанияларига фойда келтирган.

Бу сайёранинг энг бой одамида норозилик уйғотди ва у бир неча соат ичида Х ижтимоий тармоғида қонун лойиҳасига қарши қатор твитлар эълон қилди. Маск республикачининг давлат субсидиялари ҳақидаги сўзларини «очиқ ёлғон» деб атади.

«Мен бўлмаганимда Трамп сайловларда ютқазган бўларди, демократлар Вакиллар палатасини назорат қилган бўларди, республикачилар эса Сенатда 51 тадан 49 та ўринга эга бўларди. Қандай нонкўрлик», — деб ёзган Маск. У илгари бошлаган Kill the Bill кампанияси – «Қонун лойиҳасини ўлдириш» шиорини такрорлади, бу «Биллни ўлдириш» филми номига тўғри келади.