Доналд Трампга 321 та олмос кўзли узук совға қилинди - ОАВ

AP нашрининг икки мустақил заргар фикрига таяниб хабар беришича, узукнинг нархи 25 минг доллардан 35 минг долларгача бўлиши мумкин.

Фото: REUTERS

Белгиянинг бутун олмос секторини расман ифодаловчи ва мувофиқлаштирувчи Антверпен Бутунжаҳон Олмос Маркази (AWDC) Доналд Трампга АҚШ мустақиллигининг 250 йиллиги шарафига олтин узук топширди. AP нашрининг икки мустақил заргар фикрига таяниб хабар беришича, узукнинг нархи 25 минг доллардан 35 минг долларгача бўлиши мумкин.

«Freedom 250» деб номланган узук антверпенлик заргар Давид Готлиб томонидан 18 каратли олтиндан ясалган. Буюм 321 та олмос, 56 та сапфир, 13 та зумрад ва 6 та ёқут билан безатилган. Қимматбаҳо тошлардан ясалган узукда қалқон ва зайтун новдасини ушлаб турган бургут, «250» рақами ва «АҚШ 250 йиллиги» ибораси тасвирланган. Узукнинг ички қисмида «Антверпенда Доналд Жон Трамп учун ишлаб чиқарилган» деган ёзув ўйиб ёзилган.

Таъкидланишича, Антверпен олмос маркази узукни Белгиядаги АҚШ элчиси Билл Уайтга президент Трампга топшириш учун берган. Доналд Трамп ҳали бу совғани олмаган.

AP нашрига кўра, AWDC Доналд Трампдан миннатдор бўлиши керак. 2025 йилда АҚШ маъмурияти олмос импортига юқори божлар жорий этди, бу эса Белгия ишлаб чиқарувчиларига катта зарба берди. Аммо AWDC баъзи «саъй-ҳаракатлар» эвазига божларнинг олиб ташланишига эришди. Ушбу компания Қўшма Штатларга йилига 2 миллиард долларлик олмос етказиб беради.