Япония илк бор 1000 километрдан ортиқ масофага учадиган ракеталарини намойиш этди

Япония Қуруқликдаги қўшинлари илк бор 1000 километр узоқликдаги денгиз ва ерусти нишонларини яксон қилишга қодир янгиланган «Тип-12» ракета қурилмасини намойиш этди.

Қайд этилишича, намойиш 2 мингга яқин ҳарбий хизматчи иштирок этган Фужи тоғи этагидаги жанговар ўқув машғулоти вақтида бўлиб ўтган.

Yomiuri газетасининг маълумотларига кўра, ракеталарни ишлаб чиқиш ва модернизация қилиш билан Mitsubishi Heavy Industries компанияси шуғулланади. Улардан қуруқликда, кемада ва самолётларда ҳам фойдаланиш мумкин. Ўқув машғулоти давомида тўртта ракетага мўлжалланган ғилдиракли мобил учириш қурилмаси намойиш этилган. 

Манёврлар доирасида 50 га яқин танк ва зирҳли техникалар, 60 та артиллерия қурилмаси, шунингдек, 20 дан ортиқ самолёт ва вертолёт иштирок этган. Машғулотдаги отишмалар давомида қарийб 77 тонна ўқ-дори сарфланган.

«Тип-12» тизимлари 2025-молиявий йилдан бошлаб қўшинларга етказиб берилиши кутилмоқда. Биринчи навбатда уларни Кюсю оролининг жануби-ғарбий қисмига — Шарқий Хитой денгизи томон йўналган минтақага жойлаштириш режалаштирилмоқда. Бундан ташқари, мамлакат ҳукумати Американинг Tomahawk қанотли ракеталаридан 400 та сотиб олиш ниятида.