Археологлар «мисли кўрилмаган» хазинани олиб кетиш вақтида ҳужумга учраган кема қолдиқларини топди

Лиссабон томон ҳаракатланаётган кема бортида ҳозирги ҳисоб-китоблар бўйича 138 млн долларлик хазина бўлган.

Фото: Center for Historic Shipwreck Preservation

Чўкиб кетган елканли кема қолдирларини ўрганган археологлар бу Португалиянинг Nossa Senhora do Cabo кемаси эканини аниқлади, деб ёзмоқда LiveScience.

Маълумотларга кўра, 1721 йил бошида кема Португалиянинг Гоа колониясидан чиққан ва Лиссабонга йўл олган. Кема бортида ўз даврининг мисли кўрилмаган хазинаси — олтин ёмбилар ва марваридга тўла сандиқлар бўлган.

Кемадаги юкнинг умумий қиймати ҳозирги давр ҳисобида 138 миллион доллардан ошади. Аммо ҳаракат вақтида кема кучли пўртанага дуч келган, кейинроқ эса қароқчилар ҳужумига учраган. Улар Nossa Senhora do Cabo’ни эгаллаган ва хазинанинг барчаси Сент-Мари оролига кўчирилган.

Американинг Тарихий кемалар ҳалокатларини ўрганиш маркази тадқиқотчилари 16 йил давомида кема қолдиқларини ўрганган. Археолог Марк Агостиннинг сўзларига кўра, сув остидан 3,3 мингдан ортиқ буюм чиқариб олинган. Кема конструкцияси, тарихий ёзувлар ва топилмалар таҳлили мутахассислар айнан Nossa Senhora do Cabo’ни топганини тасдиқлаган.

Тайёрлаган: Фозилбек Юсупов

#кема #хазина #археологлар