«Тўйга тайёрлаган қизим эди» – Оҳангарон сув омборида юз берган фожиа ҳақида репортаж

Икки дугона суратга тушиш ва чўмилиш учун Оҳангарон сув омбори чеккасига тушиб, қайтиб чиқмаган. Учинчи қизни қутқариб қолган ўткинчи йигит воқеа тафсилотларини айтиб берди.

{Yii::t(}

Ўтказиб юбориш 6s

28 июл куни Оҳангарон сув омборида икки қиз чўкиб кетди, уларни қутқаришга уринган яна учинчи қиз ҳам ҳалок бўлишига оз қолган. Kun.uz мухбири воқеа жойига бориб, фожиа тафсилотларини ўрганди.

Қизлардан бирини қутқариб қолган йигит агар бир неча дақиқа олдин кўришганида, қолганларни ҳам қутқариб қолиш мумкин бўлгани ҳақида гапирди.

«Қизлар анча вақт ёрдам сўраб бақирган. Лекин на қоровул, на бошқаси эшитган», – дейди у.

Унинг сўзларига кўра, ушбу фожиа соат 12:40 ларда рўй берган.

«Мана шу жойга томоша қилгани келгандик, бир қиз сувда бақираётганини эшитиб қолдик. Кейин мен у ёқдан югуриб сувга тушдим-да, қизни олиб чиқдим. Ярим соатдан кейин тез ёрдам машиналари келди, хизматларини кўрсатишди. Агар 3-4 дақиқа олдин келганимизда, қолганларини ҳам қутқариб қолиш мумкин эди. Афсус, у қизнинг опаси ва дугонаси сувга ғарқ бўлган экан. Агар бу ерда қоровуллар бўлганида, қизлар бу аҳволга тушмас эди. Биз келганимизда ҳеч қанақа қоровул ҳам, қутқарув хизмати ходимлари ҳам йўқ эди», – дейди суҳбатдош.

Унинг сўзларига кўра, сув туби ботқоқлик бўлган.

«Мен ҳам биринчи қадамни босганимда тиззадан баландроқ жойга кириб кетдим. Ўзимни ўнглаб олдим. Шундан кейин у қизга қараб сузиб бориб, олиб чиқдим.

Ости 4-5 метр ботқоқлик бўлган. Бу қизлар ўша ботқоққа кириб кетаверган менимча. Буларни ботқоқ тортиб кетган. Сув ўзан ҳосил қилган. Шунда қизларни тортиб кетган.

У қиз ҳам опаларини қутқараман деб сувга тушган. Биз келган маҳал у ҳам сувда эди. Қутқариш учун ўзини ташлаган. Оқим қизни қирғоқдан 20-25 метр ичкарига олиб кетган», – дейди у.

Ҳолат юзасидан мазкур гидротехник иншоотларга масъул бўлган «Сувхўжаликназорат» инспекцияси вакили изоҳ берди. У қизлар сув омборининг назорат қилинмайдиган қисмидан сувга тушганини айтади.

«Сув омборининг дамба томонларини Миллий гвардия қўриқлайди, камералар қўйилган. У қизлар қирдан тушиб келган. У жойларни биз назорат қила олмаймиз», дейди инспекция вакили.

Инспекция ходими хавфсизлик чоралари билан боғлиқ бошқа саволларга Оҳангарон сув омбори бошлиғи Ботир Турдиев жавоб беришини билдирди.

Турдиев ҳодисага муносабат билдираркан, омбор қирғоғида бундай тупроқли тўғонлар бўлиши ноқонуний эканини маълум қилди.

«Бу воқеани ўша куни тахминан соат 15:00 ларда эшитдим. Аянчли воқеа бўлибди. Аслида бу ерда чўмилиш мумкин эмас. Охирги 2-3 йилда тадбиркорлик фаолияти бошланиб, бу ерга одамлар чўмилиш учун келяпти. Улар тадбиркорлар томонидан қайиқда сузиш, сайр қилишга жалб этиляпти. Шунинг учун одамлар бу ерга келадиган бўлиб қолди.

Олдин бу ерга ҳеч ким чўмилишга келмасди. Ҳозир бу жойлар тадбиркорларга ўтиб кетди. Мен уларни айбламайман, лекин ҳозир чўмилишга одамлар келяпти»,– дейди сув омбори бошлиғи.

У сув омборининг муҳофаза зонаси борлиги, бу қирғоқдан 150 метргача бўлган ҳудуд эканини айтади. Лекин шунга қарамай, тадбиркорлар фаолиятини амалга оширмоқда.

«Мен уларга ишлама дея олмайман. Лекин барибир шу ерда тадбиркорлик фаолиятини юритгандан кейин қандайдир назорат бўлиши керак-да. Мен шундай деб ўйлайман.

Бизда ўзимизнинг қўриқланадиган ҳудудларимиз бор. Масалан, тўғондан 400 метргача бўлган ҳудуд қўриқланади. Қолганларига биз жавоб бермаймиз. Бу ҳудуд жуда катта. Қўриқлашга жисмонан қурбимиз етмайди», – дейди у.

Ботир Турдиев фожиа содир бўлган жойларга чўмилишни тақиқловчи белгилар ўрнатилиши, лекин назорат қилишга вақт йўқлигини таъкидлайди.

«Биз тадбиркорларга келиб айтганмиз. Масалан, мана бу тўғонча бор-ку, аслида, сув омборининг муҳофаза зонасида бунақа ишлар қилиниши мумкин эмас. Ўзбошимчалик билан қилинган ишлар ҳаммаси. Бу ерда умуман қазиш ишлари мумкин эмас», – дейди у.

Ноқонуний қурилмаларни бузиш масаласи ҳақидаги саволга жавобан у тадбиркорларга бирор нима дейишга иложсиз эканини тан олди. Шу билан бирга, юқори турувчи ташкилотларга мурожаат қилишини айтди.

Шундан кейин қутқариб қолинган қизнинг хонадонига бордик. Маълум бўлишича, ангренлик қиз марҳума опаси билан бирга Оҳангаронга меҳмонга борган.

«19 ёш эди, тўйга тайёргарлик кўраётгандик. Уйда неварам кечки овқатга ҳаракат қилиб турган эди. Дугонаси билан ёнимиздаги дўконда ишларди. Кейин дугонаси “бизникига тоққа жўнатинг, холажон, эртага эрталаб 10 гача етиб келамиз” деди. Мен бормасин, кеч бўлиб қолди дедим. Лекин кейин қандай жўнатганимни билмайман.

Энди куни битиб турган экан. Кўчага чиқмаган қизлар эди, беш вақт намози бор эди. Тикувчилик коллежини битириб, араб тили курсларига борарди.

Шундан кейин эрталаб 06:00 да телефон қилдим, жавоб бермади. Кейин билсам, расмга тушамиз деб бориб чўкиб кетибди. 16 ёшли қизимни қутқаришди, раҳмат. Лекин 19 ёшли қизим қайтиб чиқмади, мурдаси чиқди. Бир-бирини етаклаб кетди...», – дейди қизларнинг бувиси.

Журналист: Шаҳзод Ўроқбоев
Видеотасвирчи: Боймирза Ҳалилов

Муаллиф: Ўроқбоев Шаҳзод

#Оҳангарон #сув омбори #чўкиш