Мерц "бир неча ҳафтадан бери" Трампдан Россияга қарши санкцияларни кучайтиришни сўраётганини айтди

Германия канцлери Фридрих Мерц "бир неча ҳафтадан бери" АҚШ президенти Доналд Трампни Россияга қарши санкцияларни кучайтиришга чақираётганини айтди. 

"Америкаликлар санкциялар ҳақида эълон қилишди, аммо бу санкциялар ҳали кучга кирмади. Агарда улар амалга ошганида эди, бу Россия иқтисодиётига сезиларли таъсир кўрсатган бўларди. Мен бир неча ҳафтадан буён АҚШ президентини шундай қилишга чақирмоқдаман", - деди Мерц ARD телеканалига берган интервюсида.

Канцлернинг фикрича, Аляскада бўлиб ўтадиган музокаралар натижасига кўра "Россия бу уруш давом этиши мумкин эмаслигини тушуниб етмаса", у ҳолда унга нисбатан босимни кучайтириш керак бўлади. 

Аввалроқ Трамп 15 август куни АҚШнинг Аляска штатида Путин билан учрашишини маълум қилганди. Россия президентининг ёрдамчиси Юрий Ушаков бу маълумотни тасдиқлади. Унинг сўзларига кўра, Путин ва Трамп "Украина инқирозини узоқ муддатга ҳал қилиш йўлларини муҳокама қилишга эътибор қаратишади".