AFP: Путин Зеленский билан Москвада учрашишни таклиф қилди. Украина президенти рад этди

Россия Федерацияси президенти Владимир Путин Украина президенти Володимир Зеленский билан учрашувни Москвада ўтказишни таклиф қилди. Бу ҳақда Agence France-Presse манбаларга асосланиб хабар бермоқда.

Агентлик маълумотига кўра, ушбу таклиф АҚШ президенти Доналд Трамп билан 18 август куни бўлиб ўтган телефон мулоқоти чоғида билдирилган – бу Трамп, Зеленский ва Европа раҳбарларининг Оқ уйдаги учрашуви давомида содир бўлган.

AFP манбаларига кўра, Зеленский Москвага бориш таклифини рад этган.

Трамп Зеленский билан музокара ва Путин билан қўнғироқлашувдан кейин уларнинг учрашувига тайёргарлик бошланганини айтди.

Франция президенти Эммануэл Макрон учрашув Женевада бўлиши мумкинлигини айтди. Путинни ҳибсга олиш учун ордер берган Халқаро жиноий суд аъзоси ҳисобланган Швейцария ҳукумати эса Путинга сафар вақтида дахлсизлик беришга тайёрлигини расман эълон қилди.

Ушбу мамлакат ТИВ раҳбари Иняцио Кассиснинг аниқлик киритишича, «муайян шароитларда» Путинга Швейцарияга ташриф буюришга рухсат берилади. Унинг тушунтиришича, ўтган йили Швейцария ҳукумати халқаро ҳибсга олиш ордери остида бўлган шахсларга иммунитет бериш қоидаларини белгилаган. «Агар бу шахс шахсий ишлари билан эмас, балки тинчлик конференциясига келган бўлса», –- деди у.

Ғарб нашрларида учрашув ўтказилиши мумкин бўлган бошқа жойлар қаторида Рим ва Будапешт шаҳарлари ҳам тилга олинмоқда.

РФ томони Путиннинг Зеленский билан учрашишга розилигини расман тасдиқламади. Президент ёрдамчиси Юрий Ушаков фақатгина Путин ва Трамп мулоқотида Россия ва Украина ўртасидаги икки томонлама музокараларнинг даражасини ошириш ғоясини муҳокама қилганини айтиб ўтганди.