Зеленский: G7 ёрдами билан Россияни тинчликка мажбур қиламиз

24 июн куни кечқурун халққа мурожаат қилган Украина президенти Володимир Зеленский мамлакат халқаро ҳамкорлар, хусусан G7 давлатлари билан муҳокама қилинган ёрдам пакетини олишга катта умид қилаётганини билдирди.

Унинг сўзларига кўра, мазкур ёрдам Украинага Россияни тинчлик музокараларига мажбур қилиш имконини беради. Бироқ Зеленский қандай турдаги ёрдам назарда тутилаётганига аниқлик киритмади.

Президентнинг таъкидлашича, G7 мамлакатлари Киев қандай ёрдам ҳақида гапираётганини яхши билади ва Украина бу қўллаб-қувватлаш ўз вақтида тақдим этилишига ишонмоқда.

Зеленский, шунингдек, Украина разведкаси ва қуролли кучларига Россия уруш кўламини кенгайтириш учун фойдаланаётган объектларга нисбатан олдиндан зарба бериш бўйича топшириқ берганини маълум қилди.

Сўнгги ҳафталарда Украина Россия ҳудудидаги энергетика инфратузилмаси ва ҳарбий таъминот учун муҳим аҳамиятга эга объектларга, айниқса нефтни қайта ишлаш заводлари (НҚЗ)га зарбаларни кучайтирди. Бундай ҳужумлар Москва, Нижнекамск, Тюмен ва Волгограддаги йирик объектларга ҳам қаратилган.

Украина томонининг маълум қилишича, ушбу ҳужумлар ортидан Россиянинг кўплаб ҳудудларида ёнилғи танқислиги юзага келган, бензин ва дизел нархи кескин ошган. Зеленскийнинг иддаосига кўра, ҳозир бундай муаммолар Россиянинг 60 дан ортиқ ҳудудида кузатилмоқда.

Унинг фикрича, бу вазият Россияни Москва вилояти, Валдайдаги президент қароргоҳи ва Қрим кўприги атрофини қўшимча ҳаво ҳужумидан мудофаа тизимлари билан кучайтиришга мажбур қилган. Бу эса бошқа йўналишлардаги ҳаво мудофаасини заифлаштирмоқда.

Зеленский Россия президенти Владимир Путинни урушни якунлаш бўйича таклифларни қабул қилмаётганликда айблади. Унинг таъкидлашича, Киев бир неча бор учрашув ва ҳақиқий тинчлик музокараларини таклиф қилган, аммо Москва бунга розилик бермаган.

Шу куни Германия канцлери Фридрих Мерц ҳам Бундестагдаги чиқишида Путин Зеленскийнинг тинчлик музокараларини бошлаш ҳақидаги аниқ таклифини рад этганини эслатди.

Шу билан бирга, Reuters агентлиги маълумотларига кўра, Украина зарбалари оқибатида Россияда бензин ишлаб чиқариш ички талабнинг тахминан 80 фоизинигина қопламоқда. Ҳозирда бензин ва дизел сотилишига расмий чекловлар мамлакатнинг 24 та ҳудудида амал қилмоқда. Қўшиб олинган Қрим ва Севастополда ёнилғи савдоси вақтинча тўхтатилган, Россия назоратидаги Луханск вилоятининг айрим ҳудудларида эса бир харидорга 20 литрдан ортиқ ёнилғи сотиш тақиқланган.

Energy Intelligence таҳлилчилари Россия энергетика инфратузилмасига қарши олиб борилаётган ҳужумлар мамлакат тарихидаги энг йирик ёнилғи инқирозларидан бирига сабаб бўлиши мумкинлигини қайд этган.

Шу муносабат билан Россия Қозоғистондан 50 минг тонна АИ-92 бензини сотиб олиш имкониятини муҳокама қилаётгани ҳақида хабарлар тарқалди. Бироқ Қозоғистон Энергетика вазирлиги Москвадан расмий сўров келиб тушмаганини маълум қилди. Россия Энергетика вазирлиги эса бу маълумотларга ҳозирча муносабат билдирмаган.