«Зеленскийнинг ишлари чакки эмас. У жасур одам» – Трамп

Доналд Трамп Украина бўйича позициясини яна бир бор ўзгартирди ва Володимир Зеленскийнинг «ишлари ёмон кетмаётгани»ни таъкидлади.

24 июн куни Оқ уйда АҚШ президентининг НАТО бош котиби Марк Рютте билан учрашуви чоғида Sky News мухбири Марк Стоун Трампга шундай савол берди: «Сиз ғолибларни ёқтирасиз. Сизнингча, ҳозир Зеленскийнинг қўли баланд келяптими?»

«Унинг ишлари ёмон эмас. Нима бўлганда ҳам у таслим бўлмаяпти. Икки томондан кўплаб одамлар ҳалок бўлмоқда, аммо мен у яхши уддалаяпти, деб ҳисоблайман. Қулоқ солинг, у мард одам эканини тан олмасдан илож йўқ. Унинг қуроллари ажойиб, аммо одамлари ҳам ажойиб, ҳақиқий жангчилар», – дея жавоб қайтарган Трамп.

Reporter: You like winners. Do you think President Zelenskyy is winning right now?

TRUMP: He's doing pretty well. Look, you have to say he's courageous. He's got fighters. pic.twitter.com/sdz5DFL6Mo

— Open Source Intel (@Osint613) June 24, 2026

Зеленский бир кун олдинги кечки видеомурожаатида Украинанинг Россия бўйлаб узоқ масофали зарбалар кампаниясининг оралиқ натижаларини сарҳисоб қилганди. У нефтни қайта ишлаш заводларига ҳужумлар туфайли Россиянинг 60 дан ортиқ регионида ёқилғи тақчиллиги кузатилаётгани, Россия ҳукумати эса ҳаво ҳужумидан мудофаа тизимларини Москва ва Валдайни яхшироқ қўриқлаш учун йўналтираётгани, натижада мамлакатнинг бошқа қисмлари ҳимоясиз қолаётганини айтиб ўтганди.

Зеленский Украина Россияни «тинчликни танлаш»га мажбур қилиш учун ҳамкорлардан ёрдам кутаётганини қўшимча қилган. «Бизнинг операциямиз, жумладан, Қримдаги операциямиз аниқ режалаштирилган. Ва унинг қандай давом этаётгани шуни яққол исботлайди: агар биз G7 доирасидаги ҳамкорларимиз билан гаплашган нарса Украинада пайдо бўлса – ва бу ҳамкорларнинг қарорига боғлиқ – биз тезда Россия тинчликни танлашга мажбур бўладиган шароитни юзага келтирамиз», – дейди у.

Трампнинг Украина бўйича позицияси ўзгарганининг сезиларли белгилари Франциянинг Эвиан шаҳрида 15-17 июн кунлари бўлиб ўтган G7 саммитидан кейин пайдо бўла бошлади. Ушбу саммитдан кейин Франция президенти Эммануэл Макрон Трамп Украинага нисбатан «ёндашувнинг ҳақиқий ўзгариши»ни намойиш этганини таъкидлади.

Financial Times манбаларига кўра, Украинанинг Россия ичкарисидаги нишонларга зарба бериш кампанияси Трампда «катта таассурот қолдирган». Kyiv Independent нашри Украинанинг юқори мартабали мулозимига таяниб ёзишича, Трамп ўзаро суҳбатларда Зеленскийни Россия билан урушда «дадилроқ» ҳаракат қилишга чақирган.

Шу билан бирга, Foreign Policy таъкидлаганидек, Оқ уй аста-секин Украинага нисбатан хайрихоҳ бўлиб бораётган бўлса-да, Вашингтон Москвага нисбатан қатъий баёнотлардан тийилмоқда. Европадаги мулозимлардан бири анонимлик шарти билан айтишича, Оқ уйдан Россиянинг уруш билан боғлиқ ҳаракатларидан бирини (айнан қайси ҳаракат назарда тутилгани ноаниқ) ошкора тарзда қоралашни сўраган. Маълум бўлишича, Оқ уй маъмурияти бу музокараларга зарар етказишидан қўрқиб, рад жавобини берган. Яна бир европалик мулозим ҳам Оқ уй вакиллари Россияни очиқчасига танқид қилишни истамаслигини тан олганини айтди.

Reuters Оқ уй позициясининг ўзгариши Москвада «кучайиб бораётган ғазаб»ни келтириб чиқарганини қайд этди. Россия ТИВ раҳбари Сергей Лавров 23 июн куни Москвада ўтказилган форум доирасида элчилар даврасида шундай деган: «Аляска, Европанинг ҳаракатлари каби, Киев режимини қайта қуроллантириш мақсадида вақтдан ютиш учун мўлжалланганди, деб ўйлашни ҳам хоҳламасдим. Бу ҳақда ўйлашни ҳам истамасдим, лекин амалда шундай бўлиб чиқди».

Бундан ташқари, Лавров Москва Оқ уйнинг Украина бўйича позициясини аниқ билмоқчи эканини қайд этган. «Биз Эвианда [G7 саммитида] нима бўлганини билмоқчимиз. Чунки Макронга қулоқ соладиган бўлсак, Анкориж унутилган, президент Трамп худди адашган ўғил ёки адашган ота каби оиласига қайтган ва энди уларнинг барчаси бирга», – деган Россия ТИВ раҳбари. Унинг қўшимча қилишича, АҚШ Россияни «бу саммитдан нима олгани» ва «кейинги йўналиши қандай бўлиши» ҳақида хабардор қилмаган.