Correctiv: Z-фаол Германияда Россия армияси учун пул йиғмоқда

Украинадаги урушни қўллаб-қувватловчи фаол Николай Фаст Германияда Донбассга «инсонпарварлик ёрдами учун» пул йиғмоқда, лекин аслида у Россия армияси учун асбоб-ускуналар сотиб олмоқда, деб ёзади Correctiv немис нашри.

Фото: Ижтимоий тармоқлар

Telegramʼда Германияда яшовчи Z-фаол томонидан яратилган, деярли 5500 кишидан иборат чатлар тармоғи бор, у бошқа нарсалар қаторида Украинада жанг қилаётган Россия армияси бўлинмалари учун жиҳозлар сотиб олиш учун пул йиғади. Бу ҳақда 25 август, душанба куни Германиянинг Correctiv нашри ёзган.

Нашр қаҳрамони — Николай Фаст. У Сибирда туғилган ва 1990-йилларда 16 ёшида Германияга кўчиб келган. Фаолнинг таъкидлашича, у Бундесверда тайёргарликдан ўтган ва Leopard танкини бошқарган. Кейин Фаст Россиянинг «Ночные волки» мотоцикл клуби билан боғланган. Correctiv унинг Владимир Путинга яқин экани маълум бўлган Александр Залдостанов раҳбар ҳисобланган клуб аъзолари билан тушган фотосуратларига ишора қилади.

Correctiv маълумотларига кўра, Россиянинг Украинага кенг миқёсли бостириб кириши бошланганидан кўп ўтмай, Фаст Telegram'да Германиянинг русийзабон аҳолисига қаратилган «Братская мотопомощь» чат гуруҳини яратди. Дастлабки мақсад Европа Иттифоқи орқали ҳаракатланишда муаммоларга дуч келган россиялик юк ташувчиларга ёрдам бериш эди.