Фридрих Мерц: Украинадаги уруш узоқ давом этади

Украинадаги уруш узоқ вақт давом этиши мумкин, деди Германия канцлери Фридрих Мерц 31 август, якшанба куни ZDF телеканалига берган интервюсида. Германия ҳукумати раҳбарининг сўзларига кўра, урушлар ё «томонлардан бирининг ҳарбий мағлубияти» билан тугайди, бунга на Москва, на Киев ҳозирча яқин эмас, ёки «иқтисодий ва/ёки ҳарбий чарчоқ» билан якунланади, Мерцнинг сўзларига кўра, бу ҳам ҳозир кузатилмаяпти.

Фридрих Мерй Европа ва АҚШнинг саъй-ҳаракатлари урушни «иложи борича тезроқ» тугатишга қаратилганини таъкидлади. Бироқ, урушни тезроқ тугатиш «агар Украина таслим бўлса ва мустақиллигини йўқотса» мумкин бўларди, аммо бу «вариант эмас», деди Германия канцлери. Унинг сўзларига кўра, бундай сценарийда кейинги мамлакат ҳужумга дучор бўлади, «ва бир неча кундан кейин — ўзимиз», деб Мерц огоҳлантирди.

Ўт очишни тўхтатгандан сўнг Украинага ғарбнинг қуруқликдаги қўшинларини юбориш эҳтимоли ҳақидаги саволга Фридрих Мерц ҳозирда бу Киевнинг «иттифоқдошлари орасида асосий мавзу эмаслигини» айтди. «Биринчи устувор вазифа — Украина армияси узоқ муддатда ўз мамлакатини ҳимоя қила олиши учун уни қўллаб-қувватлашдир», деди Мерц.