Путин Зеленский билан Москвада учрашишга тайёрлигини айтди

«Агар Зеленский тайёр бўлса - Москвага келсин», деди Россия президенти Владимир Путин Хитойга ташрифи якунлари бўйича ўтказилган матбуот анжуманида. Шу билан бирга, у «бу учрашувларда қандайдир маъно бор-йўқлигини» билмаслигини қўшимча қилди ва яна Зеленский президентлигининг қонунийлигини шубҳа остига олди.

Бундай учрашув ғоясини Путин аввалроқ, Доналд Трамп билан суҳбатда ҳам таклиф қилганди. Аммо Украина президенти «Фақат Москвада эмас», деб бу таклифни рад этди.

Аввалроқ Путин Зеленский билан учрашмаслигини бир неча бор айтганди, чунки у «ноқонуний президент», сабаби – Украинада қайта сайлов бўлмаган. Бироқ Украина қонунчилигига кўра, президентлик сайлови Украинада тўртинчи йил давом этаётган ҳарбий ҳолат тугаганидан 90 кун кейин ўтказилиши керак.

Путин сўзларидан бошқа иқтибослар:

«Россия ҳеч қачон ҳудуд эвазига Украина хавфсизлиги кафолатларини муҳокама қилмаган. Украина ўз хавфсизлигини таъминлаш тизимини ўзи танлаш ҳуқуқига эга, аммо буни Россия ҳисобидан қилмаслиги керак».

«Россия ҳудудлар учун эмас, балки одамларнинг ўз тилида гапириш ва ўз маданиятида яшаш ҳуқуқи учун курашмоқда. Россия таркибида яшашга қарор қилган халқнинг фикрини ҳурмат қилиш керак, бу демократия дегани».

«Украина ҳукумати ҳар қандай ҳудудий масалаларни ҳал қилиш учун референдум ўтказиши керак, аммо бунинг учун ҳарбий ҳолатни бекор қилиш керак».

«Агар соғлом фикр ғалаба қозонса, бу можарони тўхтатишнинг мақбул варианти бўйича келишиб олиш мумкин, бунинг устига биз амалдаги АҚШ маъмуриятининг кайфиятини кўряпмиз, бу ечимларни топишга чақириқларни кўряпмиз, туннел охирида ёруғликни кўряпмиз. Акс ҳолда, ҳаммасини қуролли йўл билан ҳал қилишга тўғри келади».