Сенат коррупцион жиноятлар кўпайган ҳудудларни маълум қилди

Ўтган йили Андижон, Наманган, Тошкент, Қашқадарё ва Самарқанд вилоятларида коррупцияга оид жиноятлар сони ошган. Иқтисодиёт ва молия вазирлиги киритган ҳужжатларда энг кўп коррупциявий омил аниқланган. Инвестициялар, саноат ва савдо вазирлиги эса лойиҳаларни коррупцияга қарши экспертизага бермаслик бўйича “чемпион” бўлган.

Фото: ДХХ видеосидан кадр

Сенат 5 сентябр кунги ялпи мажлисда Ўзбекистон Республикасида коррупцияга қарши курашиш тўғрисидаги миллий маърузани кўриб чиқди. Маърузани Коррупцияга қарши курашиш агентлиги тақдим этган.

Муҳокамада сенаторлар коррупцияга қарши курашиш соҳасида сақланиб қолаётган камчиликларга эътибор қаратди.

Хусусан, 2024 йилда республика бўйича судларда кўрилган жиноят ишлари таҳлилига қараганда, Андижон, Тошкент, Наманган, Сирдарё вилоятларида коррупцияга оид жиноятлар оқибатида давлат манфаатларига энг кўп зарар етказилган.

Коррупцияга оид жиноятлар сони Андижон, Наманган, Тошкент, Қашқадарё ва Самарқанд вилоятларида ортган.

Коррупцияга оид жиноятлар учун судланган шахсларнинг аксарияти мактабгача ва мактаб таълими, соғлиқни сақлаш, тижорат банклари ҳамда бандлик тизими ходимларига тўғри келади.

Адлия вазирлиги томонидан 2024 йилда 2 мингдан ортиқ лойиҳаларнинг 222 тасида ёки 11 фоизида 337 та коррупциявий омиллар аниқланган.

Коррупциявий омилларнинг аксарияти Иқтисодиёт ва молия, Экология, Қишлоқ хўжалиги, Олий таълим вазирликлари томонидан киритилган норматив-ҳуқуқий ҳужжатларда аниқланган.

Коррупцияга қарши экспертизага берилмаган лойиҳаларнинг кўпчилиги Инвестициялар, саноат ва савдо (6 та), Энергетика, Қишлоқ хўжалиги ҳамда Ташқи ишлар (5 тадан) вазирликлари ҳиссасига тўғри келади.

Муҳокамада Сенат аъзолари жумладан қуйидаги таклифларни илгари сурди:

коррупцион жиноятлар ошган давлат органлари ва ташкилотларида кечиктириб бўлмайдиган чора-тадбирлар белгилаш;
коррупция ҳақида хабар берган шахсларни рағбатлантириш тизими бўйича тарғибот-ташвиқот ишларини фаоллаштириш;
давлат органлари ва ташкилотлари, шунингдек маҳаллий давлат ҳокимияти органларининг ички назорат тузилмалари ходимларига қўшимча вазифалар юклатилишининг олдини олиш;
ички назорат тузилмалари томонидан назорат тадбирлари мунтазам равишда ўтказилишини таъминлаш, одоб-ахлоқ комиссияларининг фаолиятини кучайтириш.

Аввалроқ Наманган шаҳар ҳокими Анвар Отахўжаев 60 минг доллар пора олганликда айбланиб қўлга олинганди.

Тайёрлаган: Комрон Чегабоев

#Сенат #коррупция