Трамп сабри тез тугаётганини ва Россияга қарши санкциялар жорий қилишини айтди

АҚШ президенти Доналд Трамп Россия президенти Владимир Путинга нисбатан сабр-тоқати «тезда тугаётганини» ва Россияни иқтисодиётнинг молия ва энергетика соҳаларига нисбатан янги санкциялар кутиши мумкинлигини айтди.

«У (сабр-тоқат) тугаётганга ўхшайди ва тез тугайди», деди Трамп Fox News телеканалига берган интервюсида.

«Биз банкларга қарши қаратилган жуда кучли санкцияларни жорий этмоқчимиз, шунингдек, нефтга зарба бермоқчимиз ва тарифларни ҳам (киритмоқчимиз)», деб қўшимча қилди у. Трамп аввалроқ Россия нефтининг энг йирик харидорига айланган Ҳиндистонга нисбатан юқори божларни жорий қилганини эслатди. «Бу осон бўлмади, чунки бу Ҳиндистон билан зиддиятни келтириб чиқарди», деди у.

Трамп сўзларига кўра, у Россия тўртинчи йилдан бери давом этаётган можарони ҳозир ҳал қилишга тайёрми ёки йўқлигини билмайди. Шу билан бирга, у Украина президенти Володимир Зеленский музокараларга тайёрлигини жуда тез кўрсатмаганини таъкидлади.

«Танго (рақси) учун икки киши керак. Ажабланарлиси шундаки, Путин буни хоҳласа, Зеленский хоҳламайди. Зеленский хоҳласа, Путин хоҳламайди. Энди Зеленский хоҳлаяпти, Путин сўроқ остида», деди Трамп.

АҚШ президенти россиялик ҳамкасбидан норози эканини аввал ҳам бир неча бор айтиб, кучли санкциялар билан таҳдид қилган. Лекин ваъдалар ҳеч қачон амалиётгача етиб бормаган.