Лондон РФ элчисини НАТО давлатларига дронлар бостириб киргани туфайли чақиртирди

Буюк Британия Ташқи ишлар вазирлиги Россия элчисини «Россия томонидан НАТО ҳаво ҳудуди сезиларли ва мисли кўрилмаган тарзда бузилганлиги» учун чақиртирди. 15 сентябр, душанба куни Буюк Британия Ташқи ишлар ва ҳамдўстлик ҳамда тараққиёт идораси вакили Россия учувчисиз учоқларининг Полшага, кейин эса Руминияга бостириб киришига ишора қилиб, бу ҳаракатларни «қабул қилиб бўлмайдиган ҳолат» деб атади.

Лондон Полша, Руминия, Буюк Британиянинг бошқа НАТО иттифоқчилари ва Украина билан бирдамлик билдирди. Буюк Британия Ташқи ишлар вазирлиги Европа қитъаси «Россия бепарво хатти-ҳаракатларининг очиқ-ойдин кенгайиши билан яна бир бор тўқнаш келганини» ва Украинани Россия агрессиясидан ҳимоя қилиш «бутун Европа, шу жумладан Буюк Британия хавфсизлиги учун жуда муҳим» эканини таъкидлади.

Баёнотда қайд этилишича, НАТО кучларининг жавоби алянс Россия ҳаракатларини жуда жиддий қабул қилишини кўрсатади. Буюк Британия НАТО бўйича иттифоқчилари билан биргаликда янги технологиялар, жумладан, учувчисиз учоқларни аниқлаш ва учувчисиз учоқларга қарши имкониятлардан фойдаланган ҳолда алянснинг шарқий қанотидаги мудофаани кучайтиришда иштирок этмоқда.