Bloomberg: ЕИ "Дружба"дан келадиган РФ нефтига қарши чораларни муҳокама қиляпти

Европа Иттифоқи Россиядан қолган нефт импортига қарши савдо чораларини жорий этиш имкониятини кўриб чиқмоқда. Бу ҳақда Bloomberg манбаларига таяниб хабар берди.

Уларнинг манбаларига кўра, гап Венгрия ва Словакияни таъминловчи «Дружба» қувури ҳақида кетяпти. Кейинги қадамлар Европа комиссияси даражасида муҳокама қилинмоқда.

Будапешт ва Братислава ҳозиргача Москва таъминотига муқобил вариант топа олмади ва уларнинг энергия хавфсизлигига таҳдид солаётган чора-тадбирларни тўсиб қўйди.

Бироқ, чоралар Европа Иттифоқига 19 сентябр куни тақдим этилган янги, 19-санкция пакети бўйича таклифлар билан боғлиқ эмас. У Россиядан суюлтирилган газ импортини тақиқлашга қаратилган. Бундан ташқари, чекловлар Москванинг «соядаги флоти» таркибига кирувчи 100 дан ортиқ нефт танкерларига, шунингдек, Россия энергия ресурслари савдосини осонлаштирадиган учинчи мамлакатлардаги корхоналарга қаратилган бўлиши мумкин.