Молдовада тинтувлардан сўнг ўнлаб кишилар қўлга олинди

Молдовада тинтувлар натижасида 74 киши 72 соатгача қўлга олинди. Бу ҳақда 22 сентябр, душанба куни бўлиб ўтган брифингда Коррупцияга қарши кураш прокуратураси раҳбари Виктор Фуртунэ, полиция бошлиғи Виорел Чернэуцану ҳамда Ахборот ва хавфсизлик хизмати раҳбари Александр Мустяцэ маълум қилди.

Қўлга олинганларнинг барчаси Сербияда рус разведкаси ходимлари томонидан оммавий тартибсизликлар ва зўравонликларни қўзғаш учун тайёргарликдан ўтганликда гумон қилинмоқда. Бу иш 28 сентябр куни бўлиб ўтадиган парламент сайловлари олдидан мамлакатни беқарорлаштиришга уринишлар билан боғлиқ, деб хабар берди IPN.

Фуртунэнинг сўзларига кўра, ишда жами 111 киши иштирок этмоқда, уларнинг баъзилари мунтазам равишда Сербияга махсус тайёргарликдан ўтиш учун бориб келган. Иштирокчилар ҳар бири 400 евродан олган ҳамда полиция кордонларини бузиш тактикаси, қаршилик кўрсатиш усуллари, резина таёқлар ва ўқотар қуроллардан фойдаланиш усулларини ўрганган.

«Кремл Днестр дарёсининг иккала қирғоғида ва чет элда юз минглаб овозларни сотиб олиш учун юз миллионлаб евро йўналтирмоқда», деди Молдова президенти Майя Санду видеомурожаатида. «Одамлар ҳар куни ёлғон билан заҳарланяпти. Улардан юзлаб одамлар тартибсизликлар, зўравонлик ва қўрқув уруғларини сочиш учун пул олмоқда».