ФИФА ЖЧ-2030 иштирокчилари сонини 64 тага етказиш масаласини муҳокама қилди

Халқаро футбол федерацияси (ФИФА) 2030 йилги жаҳон чемпионатини 64 та жамоа иштирок этадиган турнирга айлантириш масаласини муҳокама қилмоқда. Американинг The Athletic нашри хабарига кўра, ФИФА Жанубий Америка вакиллари делегациясидан тегишли расмий таклифни олган. Гуруҳ таркибига Парагвай ва Уругвай давлатлари раҳбарлари, шунингдек, Жанубий Америка КОНМЕБОЛ конфедерацияси раҳбарлари ва Аргентина футбол ассоциацияси (АФА) раҳбари киритилган.

Муҳокама Ню-Йоркда ФИФА президенти Жанни Инфантино ва бош котиби Маттиас Графстрём иштирокида бўлиб ўтди.

Жаҳон чемпионатини 64 жамоа иштирокида ўтказиш ғояси илк бор баҳорда ФИФА йиғилишида Уругвай футбол ассоциацияси президенти Игнасио Алонсо томонидан тақдим этилган эди. Апрел ойида КОНМЕБОЛ президенти Алехандро Домингес 64 та жамоа иштирокидаги концепция 1930 йилда Уругвайда бўлиб ўтган биринчи жаҳон чемпионатининг 100 йиллигига бағишланган ноёб тадбир бўлишини айтди.

The Athletic нашрининг ёзишича, айни дамда таклиф қарама-қарши реакцияларга сабаб бўлмоқда: унинг тарафдорлари ҳам, қаршилари ҳам бор.

Турнирни кенгайтириш бўйича ҳар қандай қарор ФИФА Кенгашида муҳокама қилиниши ва маъқулланиши керак.

2030 йилги жаҳон чемпионати Испания, Португалия ва Марокаш майдонларида ўтказилади. Уругвай, Аргентина ва Парагвай турнирнинг очилиш ўйинларига мезбонлик қилади.

Эслатиб ўтамиз, 2026 йилда АҚШ, Канада ва Мексика майдонларида ўтказиладиган жаҳон чемпионатида тарихда илк маротаба 48 та терма жамоа қатнашади. Улар орасида Ўзбекистон миллий жамоаси ҳам бор.