Трамп Инфантинодан Балогунга жазони бекор қилишни сўраганини тан олди

АҚШ президенти Доналд Трамп ФИФАдан мамлакат миллий жамоаси ҳужумчиси Фоларин Балогуннинг қизил карточкасини бекор қилишни сўраганини расман тан олди. Аввалроқ Халқаро футбол федерацияси шов-шувли тарзда ушбу америкалик футболчининг дисквалификациясини бир йилга кечиктирганди ва унга Белгияга қарши ўйинда қатнашиш имконини берганди.

Президентнинг самимий иқрори

Трамп 6 июл куни Оқ уйда журналистлар билан мулоқот чоғида жаҳон чемпионатидаги сўнгги шов-шувли воқеалар юзасидан баёнот берди. Сиёсатчининг сўзларига кўра, турнир 1/16 финалида Босния ва Ҳерцеговинага қарши кечган ўйинда (2:0) Балогунни четлатиш учун ҳеч қандай сабаб бўлмаган.

«Мен эпизодни кўрдим. Ўзим яхши спортчи бўлганман, спортни ёқтираман ва уни жуда яхши тушунаман. У ерда фол йўқ эди. Шунчаки икки бақувват йигит катта тезликда югураётиб, ўзаро тўқнашиб кетган. Бу ҳакам эса... унинг тарихини суриштирадиган бўлсак, саволлар туғилади. Биласизми, мен можаро келтириб чиқаришни ёқтирмайман, аммо у жуда шубҳали. У шундай қарорлар чиқарганки, ҳеч ким ишонмаган. Ҳатто рақиб жамоалар ҳам ҳайрон бўлишган», – деди Трамп.

У спортдан хабардор эканини айтганига қарамай, футболдаги қоидаларни яхши тушунмаслигини кўрсатиб қўйди.

«Улар бу вазиятни секинлаштирилган кадрда қайта кўриб чиқмаслиги керак эди. Чунки у ерда барчаси бошқача кўринади. Оддий тезликда қараганда эса икки йигит шунчаки тўқнашиб кетганини кўриш мумкин.
Балогун ҳеч қандай ёмон иш қилмади. У – бизнинг энг яхши, жуда муҳим футболчиларимиздан. Улар эса унга қизил карточка кўрсатди...

Мен қизил карточка нималигини ҳам билмасдим. Буни унчалик муҳим эмас деб ўйлагандим. Кейин эса менга у кейинги ўйинда қатнаша олмаслигини айтишди... Бу адолатсизлик бўлган бўларди. Энг яхши футболчингдан ўйин вақтида айрилиш, кимнидир ўйин давомида жазолаш – бошқа иш. Аммо ҳали ўйналмаган ўйин учун жазолаш – ҳаддан ташқари адолатсизлик, бундай қилиб бўлмайди», – дея қайд этган президент.

Шундан кейин Трамп чиндан ҳам ФИФА президенти Жанни Инфантинога қўнғироқ қилиб, Балогуннинг дисквалификациясини бекор қилишни сўраганини тан олди.

«Шунинг учун, ҳа, мен ФИФАдан бу қарорни қайта кўриб чиқишни сўрадим. Мен ўзим жуда ҳурмат қиладиган одам билан гаплашдим. Дарвоқе, уни энди янада кўпроқ ҳурмат қила бошладим. Уни бунгача ҳам ҳурмат қилардим, энди эса ўн карра кўпроқ ҳурмат қиламан. У АҚШда жаҳон чемпионатини ўтказиш учун жуда кўп иш қилди.

Умуман олганда, бу ерда жаҳон чемпионати менинг шарофатим билан ўтказилмоқда, Байден туфайли эмас. У вақтда Байден ухлаётганди», – дея қўшимча қилган Трамп.

«Мен ФИФА адолатига ишонаман»

Сўнгги кун давомида бутун дунё бўйлаб танқидга учраган ва истеъфоси талаб қилинган Инфантинонинг ўзи учун эса Трампнинг иқрори ёқимсиз сюрприз бўлди. Шунинг учун ФИФА раҳбари ўзини оқлашга шошилиб, расмий мурожаатини эълон қилди. Футбол мулозими АҚШ президенти билан гаплашганини тан олган, аммо бу одатий амалиёт эканини ва лоббизм бўйича ҳеч қандай шубҳа бўлмаслиги кераклигини қайд этган.

«Ҳа, мен футбол бўйича жаҳон чемпионати билан боғлиқ масалаларни мунтазам равишда Қўшма Штатлар президенти билан муҳокама қиламан, чиндан ҳам у менга қўнғироқ қилди. Менга дунёдан давлат раҳбарлари, ҳукумат амалдорлари, футбол арбоблари ва бизнес раҳбарларидан турли масалалар бўйича шундай қўнғироқлар бўляпти. Суҳбат давомида мен ФИФАнинг мустақил суд органлари иштирокида юридик жараён кетаётгани ва бу масала ваколатли органлар томонидан белгиланган тартибда ҳал этилишини тушунтирдим. ФИФА тизими шундай ишлайди ва бу мен доимо амал қиладиган тамойилдир», – дейди Инфантино.

ФИФА президенти ташкилотнинг бундай масалалар бўйича қарорларига таъсир кўрсата олмаслигини ва Балогуннинг қизил карточкаси бекор қилинганидан бошқалар билан бир вақтда хабар топганини қўшимча қилган.

«ФИФА суд органлари мустақил. Улар мустақил равишда ҳаракат қилади, ФИФА Интизом кодексини қўллаган ҳолда қоидалар ва ҳар бир ишнинг ўзига хос ҳолатларини инобатга олиб, қарор қабул қилишади. Уларнинг мустақиллиги футболга ишонч ва унинг ҳалоллиги учун жуда муҳимдир ва бу ҳар доим ҳурмат қилиниши керак. Мен ФИФА интизомий қўмитаси қарорларини улар эълон қилинганда ўқийман. Баъзан улар мени ҳам ҳайратга солади. Баъзан уларга қўшиламан, баъзан эса – йўқ. Аммо мен уларни ва уларни қабул қилувчи органларнинг автономиясини доимо ҳурмат қиламан. Бизга бу қарор ёқадими ёки йўқми – бунинг аҳамияти йўқ», – деган Инфантино.

Эслатиб ўтамиз, 6 июл куни Халқаро футбол федерацияси жаҳон чемпионати 1/16 финалида Босния ва Ҳерцеговинага қарши ўйинда (2:0) қизил карточка олган Балогуннинг дисквалификациясини амалда бекор қилди (футболчига бир йил синов муддати берилди, у шу вақт ичида яна интизомий қоидабузарлик қиладиган бўлса, жазо қўлланади). Натижада америкалик ҳужумчи 1/8 финалда Белгияга қарши ўйнайдиган бўлди, ҳолбуки регламент бўйича у камида икки ўйиндан четлатилиши кўзда тутилганди. Тунда бўлиб ўтган ўйинда у майдонга тушди ва 90 дақиқа ўйнади, уч бор зарба бериб, гол ура олмади, АҚШ эса йирик ҳисобда (1:4) ютқазди.