Украина Россияга ҳужум қилди - ижтимоий тармоқларда нефт базасидаги ёнғин ҳақида хабар берилди

6 октябр, душанбага ўтар кечаси Украина Россиянинг бир қанча ҳудудлари ва қўшиб олинган Қримда турли нишонларга ҳужум қилди.

Украина учувчисиз учоқларининг уриб туширилгани ёки Россиянинг турли шаҳарларида ҳаво ҳудуди ёпилгани ҳақидаги хабарлар 5 октябр куни кечқурун тарқалди. Дронлар Белгород ва Воронеж вилоятлари, шунингдек, Қрим узра уриб туширилган. Тамбов, Нижний Новгород, Ярославл, Калуга, Краснодар, Сочи ва Геленжик аэропортларида вақтинчалик чекловлар жорий этилди. Ставропол ўлкасида дрон ҳақида огоҳлантириш эълон қилинди, Москва мэри Сергей Собянин эса пойтахт томон йўл олган учувчисиз учоқ уриб туширилгани ҳақида хабар берди.

Портловчи моддалар заводи жойлашган Дзержинск ва Нижний Новгород осмонида 10 дан ортиқ портлаш овози эшитилди, деб хабар беради Россиянинг Shot Telegram-канали. Гувоҳларга иқтибос келтирган ҳолда пост муаллифлари портлашларга Россия ҳаво ҳужумидан мудофаа тизимларининг Украина учувчисиз учоқларини уриб тушириши сабаб бўлганини даъво қилмоқда. Айни пайтда Украина Telegram-каналларида 6 октябр куни Дзержинск ва Нижний Новгород аҳолиси томонидан суратга олингани айтилаётган видеолавҳалар чоп этилмоқда. Уларда осмонда снарядлар портлаши, улардан бирида ёнғин кўриниб турибди. Маҳаллий ҳукумат ҳозирча вазиятга изоҳ бермади.

Telegram-каналлар, жумладан, Россия каналлари Феодосияга ҳужумлар ҳақида хабар бермоқда. Шаҳарда жойлашган нефт омборида ёнғин чиққани айтилмоқда. Украинанинг «Крымский ветер» Telegram-канали Евпатория ва Уютное қишлоғи ўртасидаги ҳарбий қисмда жойлашган радарлардан бири Украина Қуролли кучлари ҳужуми натижасида шикастлангани ҳақида хабар берди.

5 октябр куни кечқурун Брянск вилояти аҳолиси ҳам ракета ҳақида огоҳлантириш олди. Маҳаллий Telegram-каналлари Клинци тумани учун ракета огоҳлантириши берилганидан сўнг Клинци шаҳридаги иссиқлик электр станцияси ёниб кетгани ҳақида хабар берди. Шунингдек, улар ёнғин содир бўлган пайтда маҳаллий аҳоли томонидан олингани айтилаётган фотосуратлар ва видеоларни ҳам нашр этди.

Ижтимоий тармоқ фойдаланувчилари, шунингдек, Клинци шаҳрида иссиқлик таъминоти узилгани, яқин атрофдаги Стародуб шаҳрида эса электр таъминоти йўқлиги ҳақида хабар бермоқда. Маҳаллий ҳокимиятдан ҳозирча расмий изоҳ йўқ.

Айни пайтда Брянск вилояти губернатори Александр Богомаз ўзининг Telegram-каналида ҳеч қандай ёнғин ҳақида хабар бермаган. 6 октябрга ўтар кечаси у Клинцовский ва Унечский туманларида ракета хавфи ҳақида хабар бериб, маҳаллий аҳолини иложи бўлса уйда қолишга чақирди. Бироқ орадан 10 дақиқа ўтар-ўтмас у ракета огоҳлантириши бекор қилинганини билдирди.