Трамп агар Россия ва Украина тинчликка эришмаса, «оғир оқибатлар» ҳақида огоҳлантирди

АҚШ Украинадаги можарони тугатиш учун саъй-ҳаракатларни амалга оширмоқда, агар бу амалга ошмаса, «кўпчилик катта товон тўлайди», деди Америка президенти Доналд Трамп журналистлар билан учрашувда.

«Биз келишувга эришишга ҳаракат қиляпмиз. Агар у амалга ошса - жуда яхши. Акс ҳолда, кўпчилик катта нарх тўлайди», деди у.

Президент, шунингдек, Украина Россия билан урушда ҳали ҳам ғалаба қозониши мумкинлигини, бироқ бундай натижа бўлиши даргумонлигини таъкидлади.

Шунингдек, Оқ уй раҳбари Путин ва Зеленский ҳақидаги фикрларини айтди.

«Улар бир бирини ёмон кўради, бу эса вазиятни бироз мураккаблаштирмоқда», деди у.

Ўтган ҳафта Трамп Путин билан телефон орқали мулоқот қилди ва Зеленский билан юзма-юз учрашди. Телефон орқали суҳбат 16 октябрь куни, Украина раҳбари билан Оқ уйдаги мулоқотдан бир кун олдин бўлиб ўтган.

Трамп Путин билан суҳбатдан сўнг, у билан иккинчи учрашув - Будапештда бўлиб ўтишини эълон қилди. Саммит санаси ҳозирча номаълум, у яқин ҳафталарда бўлиб ўтиши тахмин қилинмоқда.