Путин «Буревестник» қитъалараро ракета синови якунланганини эълон қилди

АҚШ Tomahawk ракеталарини Украинага топшириши ҳақида хабарлар тарқалганидан кейин Россия президенти Владимир Путин намойиш этишга ваъда берган янги «мўъжизавий қуроли» ядровий каллак ўрнатилган «Буревестник» қитъалараро ракетаси бўлиб чиқди.

Путин бош штаб бошлиғи Валерий Герасимов ва бошқа ҳарбийлар билан йиғилишда унинг «ҳал қилувчи синовлари» якунланганини айтди. Путин ракетани дунёда ҳеч кимда бўлмаган «ноёб ва чекланмаган масофали» қурол деб атади.

Ўз навбатида, Герасимовнинг аниқлик киритишича, 21 октябрь куни «Буревестник» ҳавода тахминан 15 соат давомида 14 минг километр масофани босиб ўтган «ва бу чегара эмас». Генерал сўзларига кўра, техник хусусиятлар ракетани «ҳар қандай масофадаги юқори ҳимояланган объектларга кафолатланган аниқлик билан» учириш имконини беради.

Путин «қўллашнинг мумкин бўлган усулларини аниқлаш» ва уни қуролли кучларда жойлаштириш учун инфратузилмани тайёрлашни бошлашни буюрди. Шунингдек, у Россия ядровий кучлари «энг юқори даражада» эканини ва шу маънода мамлакат бундай қуролга эга бўлган барча давлатлардан олдинда эканини айтди.

Путин биринчи марта «Буревестник» ҳақида 2018 йилда Федерал мажлисга йўллаган мурожаатида гапирган эди. Ғарб разведкаси маълумотларига кўра, 2017 йилдан 2019 йилгача ракета камида 13 марта учирилган ва фақат иккита уриниш қисман муваффақиятли бўлган, биттаси эса фожиа билан тугаган. 2019 йилда «Буревестник» Баренц денгизига қулаб тушди ва уни чиқариб олиш пайтида портлаш содир бўлди, унда 7 киши, жумладан Саровдаги ядровий марказ олимлари ҳалок бўлди.

Ҳодиса оқибатида пайдо бўлган радиация булути Северодвинскни қоплаб, Скандинавия мамлакатларига етиб борган эди. «Буревестник»нинг сўнгги маълум синови 2023 йилда бўлиб ўтган, шунда Путин муваффақият ҳақида гапириб, ракета устидаги ишлар «деярли тугаганини» таъкидлаган эди.