Европа Иттифоқи санкцияларга қарамай, Россиянинг энг йирик савдо ҳамкорлари учлигига кирди

Европа Иттифоқи Украинадаги уруш туфайли жорий этилган санкцияларни ҳисобга олган ҳолда ҳам Россиянинг ташқи савдосида сезиларли рол ўйнашда давом этмоқда.

2024 йилда ҳамдўстлик Москванинг энг йирик ҳамкорлари рўйхатида учинчи ўринни эгаллади, деб ёзди Bild Германия Иқтисодиёт Институти (IW) маълумотларига таяниб.

Томонлар ўртасидаги товар айирбошлашнинг умумий ҳажми 67,5 миллиард еврони (тахминан 78 миллиард доллар) ташкил этди. Шу билан бирга, Европа Иттифоқининг аксарият давлатлари Россиядан харидларни қисқартирди. Шундай қилиб, Германия урушдан олдинги 2021 йилга нисбатан импортни 92 фоизга қисқартирди, аммо мамлакатлар ўртасидаги умумий савдо ҳажми ҳали ҳам 9,5 миллиард долларни ташкил этмоқда.

Шунингдек, Россия билан савдо ҳажмининг кескин пасайиши Италия (-83 фоиз), Белгия (-67 фоиз), Испания (-63 фоиз), Чехия (-51 фоиз) ва Словакияда (-31 фоиз) кузатилди. Венгрия, аксинча, кўрсаткични 31 фоизга ошириб, 6,2 миллиард долларга етказди. Франция ва Нидерландия билан товар айирбошлаш ҳажми ҳар бири учун 6 миллиард долларни ташкил этди. IW ҳисоб-китобларига кўра, 2024 йилда Россия экспортининг умумий ҳажми йиллик ҳисобда 18 фоизга ўсиб, 330 миллиард долларга етди. Россиянинг асосий савдо шериги Хитой бўлиб қолмоқда, унга асосан нефть, газ ва кўмир етказиб бериш ҳисобига 244,8 миллиард долларлик товар айланмаси тўғри келади. Умуман олганда, Москва Пекинга 130 миллиард долларлик энергия етказиб берди. Россия товарларини импорт қилувчилар орасида иккинчи ўринни асосан нефть сотиб олиш ҳисобига Ҳиндистон эгаллади. Украинада уруш бошланишидан олдин у 12-ўринни эгаллаган.

Россия билан савдо алоқаларини 2021 йилга нисбатан Арманистон (+423%), Исроил (+240%), Ўзбекистон (+135%), Бразилия (+98%), Озарбойжон (+76%), Миср (+70%) ва Туркия (+53%) ҳам кенгайтирди.