АҚШ ядровий синовлари Трампнинг Нобел мукофоти учун имкониятларини йўққа чиқариши мумкин

АҚШ президенти Доналд Трамп томонидан эълон қилинган ядровий синовлар унинг тинчлик бўйича Нобел мукофотини олишга бўлган уринишларига путур етказади, шунингдек, кераксиз эскалацияга олиб келади, деб ёзди The Washington Post.

Нашрнинг қайд этишича, Трампнинг Пентагонга Россия ва Хитой билан «тенг шартларда» ядро қуроли синовларини бошлаш топшириғи хитойлик ҳамкасби Си Жинпинг билан муҳим савдо учрашуви олдидан АҚШ ҳарбий қудратини намойиш этишга уриниш бўлган. Бундан ташқари, бу баёнот Қўшма Штатларнинг кўп йиллик ядро сиёсатининг ўзгариши ҳақида сигнал берди, бу эса Россия ва Хитой билан муносабатларда узоқ муддатли оқибатларга олиб келиши мумкин.

Шунингдек, бундай кескинлашув Трампнинг тинчлик бўйича Нобел мукофотини олишга уринишларига путур етказиши мумкинлиги айтилмоқда.

Қурол-яроғ назорати бўйича экспертларнинг фикрича, Трампнинг ядровий синовлар бошланиши ҳақидаги баёноти ортиқча ва кескинлашувни келтириб чиқариши мумкин.

«Қўшма Штатлар ядровий портлаш синовларини қайта бошлаш учун ҳеч қандай техник, ҳарбий ёки сиёсий сабабларга эга эмас», деди Қурол-яроғ назорати ассоциацияси ижрочи директори Дэрил Кимбалл.

Унинг қўшимча қилишича, Миллий ядровий хавфсизлик бошқармаси синовларни дарҳол қайта бошлаш имкониятига эга эмас ва бунинг учун унга камида 36 ой керак бўлади. Айтишларича, агентлик ходимларининг аксарияти «шатдаун» туфайли ҳақ тўланмайдиган таътилга чиқарилган.

Карнеги халқаро тинчлик жамғармаси катта илмий ходими Тун Чжаонинг фикрича, Трампнинг баёноти Пекинни ядровий тадқиқотларни тезлаштиришга ундаши мумкин.

«Агар Қўшма Штатлар ҳақиқатан ҳам ядровий қуролларни етказиб бериш бўйича шунга ўхшаш технологияларни ишлаб чиқишни бошласа, Пекин ҳам бундан ўрнак олиши эҳтимоли катта», деди у.

30 октябрь куни Трамп ядро қуроли синовлари зудлик билан бошланишини эълон қилди. Унинг сўзларига кўра, Пентагонга бошқа ядровий кучлар билан «тенг асосда» Америка ядровий арсеналини синовдан ўтказишни буюрган.

Кейинроқ Кремль бу баёнотга муносабат билдирди. Россия президенти Владимир Путиннинг матбуот котиби Дмитрий Песковнинг аниқлик киритишича, Россиянинг «Буревестник» ва «Посейдон» қанотли ракеталари синовлари ядровий портлашларни ўз ичига олмаган ва ядровий синовлар тақиқини бузмаган. Унинг умид қилишича, бу маълумот «президент Трампга тўғри етказилган».