ГФРдаги дронлар фирмаси: Украинга зирҳли техника ўрнига дронлар керак

Украинага Ғарб қурол-яроғи етказиб беришида ҳозирча асосий урғу зирҳли техникага қаратилган, дронлар эса етарлича тақдим этилмаяпти. Бундай фикрни Мюнхендаги дрон ишлаб чиқарувчи Helsing стартапи ҳаммуассиси Гундберт Шерф билдирди. Менежер билан суҳбатни dpa ахборот агентлиги 2 ноябр куни эълон қилди.

«Дрон операторлари билан яқин ҳамкорлик ва Украинадан келаётган маълумотларнинг ошкоралиги туфайли манзарани жуда равшан кўряпмиз: йўқотишларнинг 80–90 фоизи ҳар икки томонда ҳам дронлар сабаб юз бермоқда», — деди Шерф.

«Биз устувор жиҳатларни тўғри белгилаганмизми-йўқми, қайта кўриб чиқишимиз керак. Менинг тасаввурим мутлақо аниқ: бизга икки хил тизим ҳам керак — ҳам анъанавий, ҳам автоном. Бу мудофаа саноатининг икки устуни», — дея давом этди у.

«Ҳозир биз гўё формулани топгандекмиз: зирҳли техника ва дронлар. Тенгдек эшитилади, — деди у. — Амалда эса режаларга қаралса, бюджет нисбати ҳали-ҳамон 99 га 1 (зирҳли техника фойдасига). Бу Украина тажрибасини ҳам, яқин йиллардаги воқеий ривожланишни ҳам акс эттирмайди».

Helsing Украинага сунъий интеллект қўлланадиган HF-1 ва HX-2 ҳужумкор дрон-камикадзеларини етказиб беради. ОАВ бу дронларни «мини-Таурус» деб атай бошлаган — бу ном Киев анчадан бери Берлиндан сўраб келаётган немис TAURUS қанотли ракеталарига ишора қилади.

Мюнхен стартапи узоқ вақт давомида Германия ҳукуматидан Украинага етказиб бериладиган дронлар учун давлат молиясини сўраган. 2024 йил ноябрда Германия ҳокимияти Helsing дронларини давлат ҳисобига Киевга етказишга ваъда берган, аммо кейин бу етказиб беришларнинг тақдири номаълум қолган. 2025 йил июн ойида компания 1 млрд евродан ортиқ хусусий инвестиция жалб этганини маълум қилди, давлат субсидиялари ҳақида эса хабар берилмаган.

Helsing раҳбарининг баёнотлари снаряд ва зирҳли техника ишлаб чиқарувчи Rheinmetall концерни бошқарувчиси Армин Паппергернинг яқиндаги сўзларига кескин зид. У Handelsblatt газетасига 24 октябр куни берган интервюсида бундай деган эди: «(Украинадаги) ҳозирги уруш шуни кўрсатмоқдаки, урушлар ҳали-ҳамон зирҳли техника ва ракеталар билан олиб борилади. Бу келажакда ҳам ўзгармайди. Келажак урушларида фақат дронлар ишлатилади, деган гап — мантиқсизлик».