Нэнси Пелоси сиёсатни тарк этади, Трамп буни Америка учун буюк воқеа деб атади

АҚШ Вакиллар палатасининг собиқ спикери Нэнси Пелоси 2026 йилда бўлиб ўтадиган навбатдаги сайловларда иштирок этмаслигини ва шу тариқа АҚШ Конгрессидаги қарийб 40 йиллик фаолиятини якунлашини эълон қилди.

The Washington Post (WP) нашрининг ёзишича, 85 ёшли Пелоси ўз сайловчиларига йўллаган видеомурожаатида, шунингдек, сайловгача қолган сўнгги йилни Сан-Франциско минтақаси вакили сифатида «миннатдорлик билан» ўтказишини айтган.

Бу баёнот кутилмаган ҳол бўлмади. Бундай қарор Пелоси томонидан қабул қилиниши мумкинлиги ҳақида АҚШ оммавий ахборот воситалари аллақачон Конгресс ва Калифорниядаги манбаларга таяниб хабар берган.

Штат аҳолиси сайлов округлари чегараларини қайта тақсимлаш тўғрисидаги 50-таклифни қўллаб-қувватлаганидан кейин у сиёсатдан кетишини эълон қилиши кутилган эди. Нэнси Пелоси Демократик партияга 2026 йилда Конгрессга оралиқ сайловларда қўшимча ўринлар олиш имконини берадиган ушбу қонун лойиҳасини фаол қўллаб-қувватлади. Сайловчилар 4 ноябрь куни бўлиб ўтган овоз бериш жараёнида қонун лойиҳасини қўллаб-қувватладилар ва энди Пелоси хоним «катта ғалаба фонида кетмоқда - бу унинг ютуқлари гултожи бўлади», деб NBC калифорниялик демократлардан бирининг сўзларини келтирди.

Нэнси Пелоси Вакиллар палатасининг биринчи аёл спикери бўлди ва бу лавозимни икки марта эгаллади: 2007-2011 йилларда ва 2019-2023 йилларда. WP таъкидлаганидек, Пелоси хоним Капитолий тепалигида ўзидан олдинги ва кейинги лавозимдаги ҳар қандай эркакдан кўра кўпроқ таъсирга эга эди.

АҚШ президенти Доналд Трамп Вакиллар палатасининг собиқ спикери Нэнси Пелосининг фаолиятини якунлагани ҳақида фикр билдирди ва буни Қўшма Штатлар учун буюк воқеа деб атади.

«У ёвуз, коррупцияга ботган ва мамлакатимиз учун фақат ёмон нарсаларга эътибор қаратган эди... У менга икки марта импичмент эълон қилишга муваффақиятсиз уриниб кўрганидан жуда фахрланаман», деди Доналд Трамп Fox News учун берган изоҳида.