Дунё океанидаги танкерларда миллиард баррел нефт тўпланиб қолди – ОАВ

Дунё океанидаги танкерларда тахминан миллиард баррел нефт тўпланиб қолди. Август ойи охиридан буён бу кўрсаткич ўсди - кўп жиҳатдан санкциялар остидаги Россия, Венесуэла ва Эрондан ташилган нефт ҳажмининг ўсиши ҳисобига, деб ёзди Bloomberg агентлиги кемаларни кузатувчи Vortexa, Kpler ва OilX маълумотларига таяниб.

Агентлик маълумотларига кўра, ёз охиридан бери жаҳон океанидаги танкерлардаги нефт ҳажми сезиларли даражада ошган - ўсишнинг 40 фоизгача қисмини Россия, Венесуэла ва Эрон нефти (ёки келиб чиқиши ноаниқ нефт) таъминлаган.

Агентлик таҳлилларига кўра, танкерларда тўпланган нефтнинг асосий қисми Россиядан. Унинг денгиз юклари сўнгги ҳафталарда ошди, чунки Россия, биринчидан, ОПЕК давлатлари билан келишувга кўра нефт қазиб олишни кўпайтирмоқда, иккинчидан, Украинанинг нефтни қайта ишлаш заводларига ҳужумларидан қўрқиб, нефтнинг бир қисмини экспорт терминалларига йўналтирган бўлиши мумкин.

Шу билан бирга, санкциялар туфайли баъзи давлатлар ўз портларида нефт ортилган танкерларни қабул қилишдан бош тортгани, Россия нефти ортилган кемалар эса ҳуқуқий ноаниқликлар туфайли лангар ташлашга мажбур бўлаётгани сабабли нефт денгизда танкерларда қолиб кетяпти.

Шундай қилиб, август ойининг охиридан бошлаб дунёда танкерлардаги Россия нефти ҳажми кескин ошди. Октябр ойи охирига келиб, у қарийб 390 миллион баррелга етди, деб ёзади агентлик.

Clarksons Securities таҳлилчилари, шунингдек, бундай нефт ҳажмининг ўсишини Ғарб санкцияларининг кучайтирилиши билан боғламоқда, бунинг натижасида Россия нефти портлардан жўнатилмаяпти.

Шу билан бирга, танкерларда нефтнинг денгизда тўпланиб қолиши унинг ҳеч қачон сотилмаслигини англатмайди, деб таъкидлайди агентлик. Бироқ, унинг талаб қилинмаган ҳажмининг ўсиши келгуси ойларда нефт нархлари динамикасига таъсир қилиши мумкин, деб ҳисоблайди трейдерлар.