Қўшимча функционаллар
-
Тунги кўриниш
«Бу Путинга аниқ ишора» - НАТО янги ракета тизими учун 50 млрд доллар ажратади
НАТОга аъзо ўн икки мамлакат, жумладан, Буюк Британия, келгуси 10 йил ичида Европа мудофаасини мустаҳкамлашга мўлжалланган янги узоқ масофали ракета тизимини яратиш учун 37 млрд фунт стерлингдан (тахминан 50 млрд доллар) кўпроқ маблағ сарфлаш ниятида.
8 июль куни Буюк Британия бош вазири девони Deep Precision Strike («Юқори аниқликдаги узоқ масофали зарба») лойиҳасининг ишга туширилганини эълон қилди, деб хабар берди BBC. Ушбу ташаббус Туркиянинг Анқара шаҳрида бўлиб ўтаётган НАТО саммитида муҳокама қилинадиган мавзулардан бирига айланиши кутилмоқда. Бош вазир Кир Стармер Буюк Британия ҳукумати раҳбари сифатидаги сўнгги НАТО саммитида иштирок этмоқда.
Стармер янги ракета дастурини биргаликда ишлаб чиқишни муҳокама қилиш учун ўнга яқин давлат раҳбарлари билан алоҳида учрашув ўтказади.
«Чуқур зарба»
НАТОнинг энг замонавий қуролларидан бири деб аталаётган Deep Strike (сўзма-сўз таржимаси «Чуқур зарба») туридаги янги ракета тизими қарийб 300 км масофадаги нишонларга юқори аниқликда зарба бериш учун мўлжалланган, келажакда эса унинг масофаси 2 минг км гача оширилиши мумкин.
Буюк Британия бош вазири Кир Стармер Лондон бошчилигидаги ташаббус «европалик иттифоқчиларни бирлаштиришга ёрдам бериши ва НАТО хавфсизлигини кўп йиллар давомида таъминлашини» таъкидлади.
Британия ташқи ишлар вазири Иветт Купер лойиҳа устидаги ишни «дунё анча хавфлироқ бўлиб қолганини англашнинг бир қисми» деб атади.
«Гап кучлироқ НАТО доирасида Европани қандай қилиб янада кучлироқ қилиш ҳақида кетмоқда», — деди у Анқарадан туриб BBC Breakfast дастурига берган интервьюсида.
Бироқ, бошқа кўплаб истиқболли ҳарбий дастурлар сингари, Deep Strike тизимининг 2030-йиллардан олдин фойдаланишга тайёр бўлиши даргумон.
Стармер Буюк Британия ва унинг иттифоқчилари хавфсизлигини таъминлашга «қатъий бел боғлаганини» қайд этди. «Биз янада кучлироқ ва кўпроқ европалашган НАТО яратиш учун олдинга қадам ташлашимиз керак», — деди у.
Британия ҳукумати 2030 йилгача 300 млрд фунт стерлинг ажратишни кўзда тутувчи Мудофаа сармоялари режасини аллақачон тасдиқлаган.
«Путин, НАТО кучайди»
Анқарадаги саммитда Буюк Британия бош вазири Кир Стармер, Лондоннинг фикрича, Россия Буюк Британия ва бутун НАТО учун туғдираётган таҳдидни алоҳида таъкидлаш ниятида. Британия ҳукумати маълумотларига кўра, НАТО самолётлари альянс мамлакатлари ҳаво ҳудудига яқинлашаётган Россия ҳаво кемаларини тутиб қолиш учун 700 мартадан ортиқ ҳавога кўтарилган, Британия сувлари яқинида Россия ҳарбий кемаларининг фаоллиги эса 30 фоизга ошган.
Стармернинг айтишича, гарчи НАТО Россия билан зиддиятга интилмаётган бўлса-да, альянс ҳар бир иттифоқчисини ҳимоя қилишга тайёр туриши керак.
«Юқори аниқликдаги узоқ масофали зарба бериш тизимлари туфайли Буюк Британия ва унинг иттифоқчилари армиялар фаоллигини таъминловчи муҳим ҳарбий объектлар ва логистика инфратузилмасига зарба бера олади. Бу ҳар қандай тажовузкорни тийиб туриш имконини беради ва умумий хавфсизлигимизни мустаҳкамлайди», — деди Буюк Британия ташқи ишлар вазири Иветт Купер.
«Анқарада биз Россия президенти Владимир Путинга аниқ ишора бермоқдамиз: НАТО кучайди, янада европалашди ва ўз фуқароларини ундан ҳамда Россиядан келаётган узоқ муддатли таҳдиддан ҳимоя қилишга тайёр», — деб қўшимча қилди у.
Буюк Британия Бош вазири девонида қуйидагилар қайд этилди: «Украина қуролли кучлари узоқ масофага мўлжалланган тизимлардан самарали фойдаланиш жанг майдонидаги вазиятни тубдан ўзгартириши, душманга фронт чизиғидан анча узоқда зарар етказиш имконини беришини исботлади».
Шунингдек, у ерда асосий логистика марказларига берилган зарбалар «Россиянинг ўз ҳужум операцияларини қўллаб-қувватлаш қобилиятини сезиларли даражада пасайтиргани» таъкидланди.
