Андижонда заргарлик буюмларини ички аъзоларига яшириб олиб кирмоқчи бўлган аёллар қўлга тушди

“Истанбул–Андижон” йўналиши билан учиб келган уч нафар аёл 225,3 грамм заргарлик буюмларини яширинча олиб ўтишга уринган.

Фото: Андижон вилояти божхона бошқармаси

Андижон аэропортида тилла тақинчоқларни ички аъзоларига яшириб олиб кирмоқчи бўлган уч аёл қўлга тушди, деб хабар берди вилоят божхона бошқармаси ахборот хизмати.

Хабарга кўра, Андижон аэропортида “Истанбул–Андижон” йўналиши билан учиб келган бир гуруҳ йўловчилар божхона ходимларида шубҳа уйғотган.

Белгиланган тартибда шахсий кўрик ўтказилганида, уч нафар аёл томонидан умумий миқдори 225,3 гр бўлган тайёр заргарлик буюмларини ички аъзоларига яширилган холда олиб ўтишга уринишлари фош этилган.

Мазкур ҳолат юзасидан белгиланган тартибда процессуал ҳужжатлар расмийлаштирилди. Дастлабки баҳолашга кўра, ушлаб қолинган тақинчоқларнинг қиймати 200 миллион сўмни ташкил этади. Тақинчоқлар вақтинча сақловга олинган.