Полша 17 ноябрдан Беларус билан чегарадаги иккита ўтказиш пунктини очади

Полша Беларус билан чегарадаги икки чегара назорат-ўтказиш пунктини очади. Гап Бобровники–Берестовица ва Кузница–Брузги ўтказиш пунктлари ҳақида кетмоқда. Режага кўра, ушбу пунктлар 17 ноябрдан ишлай бошлайди. Бу ҳақда 14 ноябр куни Полша ички ишлар ва маъмурият вазирлигининг ҳужжатларида айтилади, ҳужжат Давлат қонунчилик маркази сайтида эълон қилинган.

Фото: Maxim Shemetov/REUTERS

Ҳужжатга мувофиқ, Кузница–Брузги чегара ўтказиш пунктидан фақат енгил автомобиллар ҳаракатланишига рухсат берилади. Бобровники–Берестовица ўтказиш пункти эса енгил автомобиллар, йўловчи автобуслар, шунингдек, Европа Иттифоқи мамлакатларида, Европа эркин савдо ассоциацияси (ЕАСТ) давлатларида, Европа иқтисодий макони тўғрисидаги келишув иштирокчилари ҳамда Швейцарияда рўйхатдан ўтказилган юк ташувчи транспорт воситалари учун очилади.

«Режалаштирилаётган чора-тадбирлар одамлар ва товарлар ҳаракатини қайта тиклашга қаратилган. Бу жамиятнинг, айниқса, ҳар куни Беларус ва Полша чегарасини кесиб ўтувчи кўп сонли тадбиркорлар, юк ташувчилар ва меҳнат мигрантларининг талабларига жавоб ҳисобланади», — дейилади Полша Ички ишлар вазирлиги изоҳида.

Ҳозирги пайтда Беларус–Полша чегарасидаги олтита чегара ўтказиш пунктларидан фақат иккитаси очиқ: юк ташувчи транспорт учун Козловичи–Кукурики ва автобуслар ҳамда енгил автомобиллар учун Брест–Тереспол.