Саудия Арабистонида автобус ва автоцистерна тўқнашуви оқибатида 45 нафар ҳиндистонлик зиёратчи ҳалок бўлди

Портлаш ва кучли ёнғин оқибатлари аянчли бўлган. Автобусда 46 нафар йўловчи бўлган, улардан фақат бир йигит омон қолган.

Фото: Reuters

16 ноябрь куни эрта тонгда Саудия Арабистонининг Муфриҳат шаҳри яқинида Маккадан Мадинага кетаётган автобус дизел ёнилғиси ортилган автоцистерна билан тўқнашиб кетиши оқибатида камида 45 нафар ҳиндистонлик зиёратчи ҳалок бўлди.

Дастлабки маълумотларга кўра, портлаш ва кучли ёнғин оқибатлари аянчли бўлган.

Қутқарув хизматлари ва маҳаллий ҳокимият вакиллари воқеа жойига етиб бориб, қутқарув ишларини олиб борган. Расмийлар жабрланганларнинг аниқ сонини ва ҳалок бўлганларнинг шахсини аниқлашда давом этмоқда.

Ҳиндистон бош вазири Нарендра Моди юз берган ҳодиса муносабати билан яқинларини йўқотган оилаларга ҳамдардлик билдирди.

Қайд қилинишича, ҳалок бўлганларнинг жасади диний урф-одатларга мувофиқ Саудия Арабистонида дафн этилади.

Ҳайдаробод полицияси хабарига кўра, автобусда 46 нафар йўловчи бўлган, улардан фақат бир йигит омон қолган. Ҳалок бўлганлар орасида 18 нафар аёл ва 10 нафар бола бўлгани таъкидланмоқда.