Андижонда 2 млрд сўмлик заргарлик буюмларининг ноқонуний айланмасига чек қўйилди

Андижон вилояти божхона бошқармаси тезкор тузилмалари томонидан ҳуқуқни муҳофаза қилувчи бошқа органлар билан ҳамкорликда Андижон шаҳрида ўтказилган тезкор тадбирда олдиндан кузатувга олинган шахс бошқа бир шахсдан заргарлик буюмлари жойланган жўнатмани қабул қилиб олаётган вақтида тўхтатиб қолинди.

Жўнатма белгиланган тартибда ва холислар иштирокида очиб кўрилганида, унинг ичида махсус тайёрланган 3 та ўрамда умумий оғирлиги 1 кг 138 гр оғирликдаги ва тилладан ишланган 175 дона тайёр заргарлик буюмлари борлиги аниқланди.

Сифати ва божхона расмийлаштирувини тасдиқловчи ҳужжатлари бўлмаган мазкур тилла тақинчоқларнинг дастлабки қиймати тахминан 2 миллиард сўмни ташкил этмоқда.

Маълум қилинишича, Андижон вилояти божхона бошқармаси ходимлари жорий йилнинг ўтган даврида заргарлик буюмларининг ноқонуний айланмаси билан боғлиқ 55 та ҳуқуқбузарлик ҳолатларига чек қўйишди. Натижада, қиймати 6 млрд. сўмдан ортиқ 7,5 кг оғирликдаги заргарлик буюмлари вақтинча сақловга олинган.