АҚШ Украина бўйича тинчлик режасини ҳафта охирига қадар тақдим этиши мумкин

Вашингтон Россиянинг Украинага қарши урушига барҳам беришга қаратилган, америкалик расмийлар таърифига кўра, урушни тугатиши керак бўлган тинчлик келишувини эълон қилишга тайёрланмоқда. Бу ҳақда Politico нашрининг Оқ уйдаги мухбири Даша Бернс чоршанба, 19 ноябр куни хабар берди. АҚШ президенти Доналд Трамп маъмуриятининг юқори мартабали бир вакили унга билдиришича, барча томонларнинг келишувни маъқуллаши ой охиригача, эҳтимол «аллақачон шу ҳафтадаёқ» кутилмоқда.

Politico АҚШ армияси вазири Дэн Дрисколлнинг кутилмаган ҳолда Киевга келганини эслатади. У Украина президенти Володимир Зеленский билан учрашиши керак эди. Кейин Зеленский Анқарага Туркия президенти Ражаб Тоййиб Эрдўған билан музокара ўтказиш учун учиб кетди. Шу билан бирга, Axios портали хабар беришича, АҚШ ва Россия Украина бўйича 28 банддан иборат махфий тинчлик режаси устида иш олиб бормоқда. Ушбу ҳужжатни муҳокама қилиш учун Россия президентининг махсус вакили Кирилл Дмитриев октябр охирида Майамига келган.

Трамп маъмуриятидаги расмийлар Politico нашрига улар «жиддий ўзгариш арафасида» эканини билдирган.

Шу билан бирга, Politico таъкидлашича, Украина, эҳтимол, тинчлик режасини ишлаб чиқиш жараёнида бевосита иштирок этмаган — худди АҚШнинг Европадаги иттифоқчилари каби. Ҳозирча ҳужжат энг оғриқли масалалар бўйича — Россия томонидан Украина ҳудудларининг босиб олиниши, украин болаларининг ўғирланиши ва Украина учун келгуси хавфсизлик кафолатлари масаласида қандай ечимларни таклиф қилаётгани ҳам аниқ эмас.

Даша Бернс ёзишича, Оқ уй тинчлик битимини Зеленскийга аллақачон ҳал қилинган масала сифатида тақдим этишни режалаштирмоқда. «Биз Украинага таклиф қилмоқчи бўлган нарса — мантиқан пухта ва ўринли», — дея иқтибос келтиради у президент маъмуриятидаги суҳбатдошидан. Маъмуриятга кўра, фронтдаги оғир вазият ва коррупция можароси босими остида Зеленский таклиф этилаётган шартларни қабул қилишга мажбур бўлади, деб ёзади Politico.