Қўшимча функционаллар
-
Тунги кўриниш
Ўзбекистоннинг Datavice компанияси АҚШ санкциялари рўйхатига киритилди
Datavice МЧЖ АҚШ Хорижий активларни назорат қилиш бошқармаси томонидан Россия инфратузилмасини қўллаб-қувватлаш ёки кибержиноятчилик билан боғлиқ фаолиятга алоқадорликда айбланган.
АҚШ Молия вазирлиги / Фото: Reuters
Ўзбекистонда рўйхатдан ўтган Datavice МЧЖ компанияси Россияга қарши АҚШ санкциялари рўйхатига киритди. Бу ҳақда АҚШ Молия вазирлиги ҳузуридаги Хорижий активларни назорат қилиш бошқармаси (OFAC) 19 ноябрь куни эълон қилди.
OFAC Тошкент шаҳрида жойлашган Datavice МЧЖ компаниясини махсус ажратилган ва блокланган шахслар рўйхатига (SDN List) киритди. Бу шуни англатадики, компаниянинг АҚШ юрисдикциясидаги барча активлари блокланиши керак ва у билан ҳар қандай молиявий операциялар Америка компаниялари ва фуқаролари учун тақиқланган.
Бундан ташқари, Datavice иккиламчи санкциялар хавфи остида қолди, яъни компания билан ҳамкорлик қилувчи ҳар қандай учинчи томон ҳам чекловларга дуч келиши мумкин.
Расмий ҳужжатда маълум қилинишича, Datavice CAATSA - Russia ва CYBER4 тоифаларига киритилган, бу эса унинг Россия инфратузилмасини қўллаб-қувватлаш ёки кибержиноятчилик билан боғлиқ фаолиятга алоқадорлигини кўрсатади.
OFAC маълумотларига кўра, Datavice МЧЖ компанияси аввалроқ АҚШ санкциялари рўйхатига киритилган Россиянинг Aeza Group LLC компанияси билан алоқадор. Aeza Group турли кибержиноий гуруҳлар, жумладан, товламачи дастур операторлари ва зарарли дастурий таъминот яратувчилари учун хостинг хизматларини тақдим этганликда айбланмоқда. Aeza Group мижозлари орасида BianLian товламачи дастурлари билан боғлиқ гуруҳлар, шунингдек, тармоқдаги ноқонуний фаолиятга ихтисослашган RedLine ва BlackSprut платформалари бор. OFAC маълумотларига кўра, ушбу тузилмалар АҚШ мудофаа саноати ва технология компанияларига, шунингдек, бутун дунё бўйлаб объектларга ҳужум қилиш учун хостинг хизматларидан фойдаланган.
АҚШ санкциялари рўйхатига киритилган Ўзбекистон компанияларининг биринчиси 2022 йил июн ойида PROMCOMPLEKTLOGISTIC хусусий компанияси бўлди. АҚШ Давлат департаменти хабарига кўра, ушбу компания 2022 йил март ойида Россиянинг «Радиоавтоматика» корхонасига қарши санкциялар жорий этилганига қарамай, у билан ҳамкорликни давом эттирган.
2023 йилда россиялик тадбиркор Алишер Усмонов билан аффилланганлиги сабабли «Оҳангаронцемент» заводи ҳам санкциялар рўйхатига киритилди.
2024 йилда OFAC санкциялари рўйхатига Ўзбекистоннинг иккита компанияси - Uzstanex ва The Elite Investment Group киритилган эди.
