ЕП собиқ депутати Россия манфаати йўлида пора олгани учун 10,5 йилга қамалди

Европа парламентининг собиқ вакили ва Уэлсдаги ўнг популистик Reform UK партияси собиқ раҳбари Нейтан Гилл Европа манфаатига зид равишда Россия Федерациясининг сиёсий манфаатларини илгари суриш учун пора олганини олдинроқ тан олган эди. Энди у Буюк Британияда 10 йил 6 ой муддатга озодликдан маҳрум қилиш жазосига ҳукм қилинди. Бу ҳақда Лондондаги Олд-Бейли марказий жиноят судида бўлиб ўтган мажлис якунларидан сўнг 21 ноябр, жума куни эълон қилинган Скотленд-Ярд баёнотида айтилган.

Ҳукмни ўқиб эшиттириш чоғида судя Бобби Чима-Грабб собиқ евродепутат «ўзининг жамоатчилик вазифаларини тегишлича бажармаслик эвазига пул олганини» таъкидлади. Унинг сўзларига кўра, Гилл Европа парламенти минбаридан Украинага нисбатан Москва учун манфаатли бўлган баёнотларни таратган. Судя Гиллнинг ҳаракатлари Буюк Британия миллий хавфсизлигига таҳдид солганини алоҳида урғулади.

Сентябр ойида 52 ёшли Гилл пора олиш билан боғлиқ айбловларнинг саккиз банд бўйича айбини тан олган эди. Бу айбловлар унга 2018 йил декабридан 2019 йил июлигача – у Европарламент депутати бўлган даврда тушган пул маблағларига тааллуқли. Прокурор Марк Хейвуд маълумотларига кўра, Гилл пора эвазига, жумладан, ўзи билан боғлиқ шахслар манфаатига мос мавзуларни Европарламентда кўтариб чиққан ва уларнинг манфаати йўлида тадбирлар ташкил қилган. Сиёсатчи 2020 йилда Европарламентни тарк этган, чунки Буюк Британия ЕИ таркибидан чиққан.

Буюк Британия тергови шуни аниқладики, Уэлсдаги Reform UK партиясининг собиқ раҳбари пулларни Олег Волошиндан олган. Волошин — собиқ украиналик сиёсатчи, у 2019–2022 йилларда Виктор Медведчук раҳбарлигидаги «Оппозицион платформа – за жизнь» партиясидан Украина Олий Радаси депутати бўлган. Медведчукни Россия президенти Владимир Путиннинг яқин одами сифатида ҳам тилга олишади.

Сиёсий фаолияти даврида Волошин россияпараст позицияни фаол тарғиб қилган — жумладан, «ДХР» ва «ЛХР» тузилмаларининг пайдо бўлишини оқлаб келган. Сиёсатчининг Россия билан Украинада «вазиятни издан чиқариш»га қаратилган эҳтимолий алоқалари фонида 2022 йилда у АҚШнинг санкциялар рўйхатига киритилган.

2023 йилда Украинада Волошинга давлатга хиёнат айби қўйилди. Бироқ бу вақтга келиб у мамлакат ҳудудида бўлмаган — Украина Хавфсизлик хизмати маълумотларига кўра, у Россиянинг тўлақонли ҳужуми бошланишидан сал олдинроқ мамлакатни тарк этган. Украинадаги «Стопкор» лойиҳаси хабарига кўра, Волошин оиласи билан Беларусда.

Олег Волошин билан Германиядаги ўнг популистик «Германия учун муқобил» партияси вакили Максимилиан Кра ўртасида ҳам алоқадорлик бор, деб ҳисобланади. 2023 йил декабр ойида АҚШ Федерал тергов бюроси вакиллари Крани Кремлга яқин манбалардан «шубҳали тўловлар» олган-олмагани юзасидан сўроқ қилган.

Der Spiegel маълумотларига кўра, Америка махсус хизматлари қўлига Волошин ва Кра ўртасидаги ёзишмалар тушган, унда россияпараст фаол немис ўнг популисти билан қандайдир «техник топшириқлар» учун «компенсация» масалаларини муҳокама қилган. Бундан ташқари, Кранинг исми Чехия Москвa билан боғлиқ деб ҳисоблаётган Voice of Europe онлайн-платформаси атрофидаги можаро пайтида ҳам тилга олинган.

Сентябр ойида Бундестаг Кранинг парламент иммунитетини коррупция ва Хитой фондлари орқали пул ювишда гумон қилинган тергов муносабати билан бекор қилди. Сиёсатчи Россия билан алоқадорлик ҳақидаги айбловларни рад этмоқда.