Бениндаги давлат тўнтариши ташкилотчиси қочиб кетди

7 декабр куни Бенинда ўзларини «Қайта қуриш бўйича ҳарбий қўмита» деб атаган ҳарбийлар миллий телевидение эфирида президент Патрис Талонни ағдаришгани ва ҳокимиятни қўлга олишгани, мамлакат бошқаруви вақтинча подполковник Тигри Паскал бошчилигидаги ҳарбий кенгашга ўтганини эълон қилишганди.

Фото: AP

Бенинда давлат тўнтаришини амалга оширишга уринган исёнчилар етакчиси подполковник Паскал Тигри қочиб кетди.

"Манбаларга кўра, айрим исёнчилар қочиб кетган. Улар орасида полковник Тигри ҳам бор", - деб хабар берди 24heuresauBenin нашри.

Нашрнинг ёзишича, мамлакат ҳарбийлари ва хавфсизлик хизмати ходимлари қочиб кетган исёнчиларни қидирмоқда.

Президент офиси AFP агентлигига берган изоҳида «Бу фақат телевидениени назорат қилаётган кичик бир гуруҳ бўлиб, мунтазам армия назоратни тиклаётгани, шаҳар ва мамлакат тўлиқ хавфсизликда» эканлигини билдирди.

Талон ўз лавозимидаги икки муддатдан сўнг келаси йили истеъфога чиқиш ниятида эканини маълум қилганди.

67 ёшли Талоннинг иккинчи ваколат муддати 2026 йил баҳоригача, навбатдаги президентлик сайловлари апрел ойида бўлиб ўтиши керак эди.

Ғарбий Африканинг ушбу давлатида тўнтаришга уриниш қўшни Гвинее-Бисауда президент Умаро Сиссоко Эмбало ҳокимиятдан ағдарилганидан ўн кунча вақт ўтиб содир бўлди.

Тайёрлаган: Дилшодбек Асқаров

#ҳарбий тўнтариш #Бенин