Бенинда ҳам ҳарбий тўнтариш амалга оширилди

Бенинда ҳарбийлар миллий телевидение эфирида президент Патрис Талонни ағдаришгани ва ҳокимиятни қўлга олишгани ҳақида эълон қилишди. Конституция амал қилиши тўхтагани, барча қуруқлик чегаралари, шунингдек, мамлакат ҳаво кенглиги ёпилган. Мамлакат бошқаруви вақтинча подполковник Тигри Паскал бошчилигидаги ҳарбий кенгашга ўтган.

Фото: BTV

Франциянинг Бениндаги элчихонаси хабарида айтилишича, президентнинг Котону шаҳридаги (пойтахт эмас) қароргоҳи ҳудудида отишма овозлари эшитилган. Элчихона Франция фуқароларини хавфсизлик нуқтайи назаридан ўз уйларини тарк этмасликка чақирган.

Ўзларини «Қайта қуриш бўйича ҳарбий қўмита» деб атаган ҳарбийлар давлат телевидениеси орқали чиқишида махсус йиғилиш ўтказилгани ва унда «Патрис Талонни республика президенти лавозимидан четлатиш» тўғрисида қарор қабул қилганини маълум қилди.

Бироқ Талон яқинлари президент хавфсиз жойда эканини айтмоқда.

«Бу фақат телевидениени назорат қилаётган кичик бир гуруҳ. Мунтазам армия назоратни тикламоқда. Шаҳар ва мамлакат тўлиқ хавфсизликда», – дейилади президент офисининг AFP агентлигига берган изоҳида.

Талон ўз лавозимидаги икки муддатдан сўнг келаси йили истеъфога чиқиш ниятида эканини маълум қилганди.

67 ёшли Талоннинг иккинчи ваколат муддати 2026 йил баҳоригача, навбатдаги президентлик сайловлари апрел ойида бўлиб ўтиши керак эди.

Талон – Бенинда «пахта қироли» сифатида машҳур бўлган йирик тадбиркор ҳисобланади. У 2016 йилги сайловлар натижасида ҳокимиятга келганди. Талон учинчи муддатга сайланмасликка ваъда берган ва ўз ворисини ҳам маълум қилганди.

Ғарбий Африканинг ушбу давлатидаги тўнтариш қўшни Гвинее-Бисауда президент Умаро Сиссоко Эмбало ҳокимиятдан ағдарилганидан ўн кунча вақт ўтиб содир бўлмоқда.

Ғарбий Африкада сўнгги йилларда бир неча бор давлат тўнтаришлари амалга оширилди, хусусан, Буркина-Фасо, Гвинея, Мали ва Нигерда ҳарбийлар ҳокимият тепасига келди, бу эса минтақада хавфсизлик билан боғлиқ вазият оғирлашиши борасидаги хавотирларни кучайтирди.

Тайёрлаган: Азиз Қаршиев

#ҳарбий тўнтариш #Бенин